November ni 28 khan Mizoramah Myanmar sipai 30 an inpe leh a, a tukah Myanmar-ah thawn kir an ni.Kar hmasa tawp lam atang khan Myanmar-a Lailenpi velah Myanmar sipaite leh sipai sorkar paih tuma beitute nasa takin an inkap a, Lailenpi-a duty Myanmar sipai 30-te chu Thawhlehni khan Mizoramah an inpe a ni.
Lailenpi hi Siaha district zawna awm a ni a, sipai inpete pawh hi Siaha district-a Laki khuaah kalin an inpe a ni. Laki hi Tipa sub division huam chhunga mi a ni a, Tipa-a Assam Rifles awmte’n Laki-ah kalin an lo dawngsawng a ni.
Thu dawn danin, sipai 30-te hian kein Laki hi an pan a, kawng an hriat loh avangin kawng laka an mi hmuh mi pakhatin Laki a hruai thleng a ni.
Nilaini khan Myanmar panin Indian Air Force helicopter hmanga phurh an ni a, Moreh panpui phawtin, chuta tangin Myanmar panpui tum an ni. Thu dawn danin, zing lam dar 9.30-ah leh dar 10.30-ah Tipa helipad atangin Moreh panpui an ni.
November ni 13 khan Myanmar sipai 39 chu Mizoramah an lo inpe tawh a, a tukah mi dang pali an inpe leh. Anni hi Myanmar-ah thawn kir an lo ni tawh.
Myanmar sipai inpe tharte Myanmar-ah thawn kir
