MZP-in 8th Schedule-a
luh a la hmanhmawh lo
Mizo Language Development Board (MLDB) kaihhruaiin 8th Schedule chungchangah 8th Schedule Study Group, MZP leh Central YMA an inkawmho a. Study Group hmalak tawhna ngaihthlak niin, MZP leh CYMA-in an ngaihdan an sawi.
MZP president Dr C Lalremruata chuan, kumin March 15-a Union Home minister Amit Shah Aizawl a lokal tumin NGO delegation zingah a tel a, CYMA-in 8th Schdule-a Mizo tawng dah an sawi tumin Home minister hian India ramah tawng chi 20 aia tam diltu an awm a, ngaihtuahna hman that a ngai tih a sawi thu a sawi chhawng. Joint NGO Delegation-in kumin April 15-a Union Home secretary an hmuh tuma a lo chhanna pawh Home minister chhanna ang tho a ni tih a sawi bawk.
“Pathianin hnamah min din a, mak tak maiin Zofate zingah Lusei tawngin Bible leh Hlabu kan nei hmasa ber a; Pathian thu pawh Lusei tawnga hrilh kan ni a, Pathian malsawmna kan dawn pakhat a ni. 8th schedule chungchanga hmalaknaah hian, hman atangin MZP ngaihdan a la ngai reng a, Mizorama cheng zawng zawng hian Mizo an ni tih an la inpawm loa, Mizo-a kan inpawm kim hun nghah a tul a ni,” a ti.
Heng hunah hi chuan MZP chu 8th Schedule-a Mizo tawng dah tura duh ber tur leh a nawr nasa ber tur an nih a ring tih pawh sawiin, Expert Committee zirchianna hrang hrang lawmawm a tih thu a sawi a. Hemi kawnga hma la tur hian hruaitu hmasate thurawn la chung zela an kal a tul thu leh hun reilote an la mamawh thu te, chumi chhunga inbuatsaihna thui tak a kal theih an beisei thu te a sawi a ni.
MZP-in 8th Schedule-a luh a la hmanhmawh lo
