MZP-in Zoram Ni hmang
India sawrkarin Mizoram a bomb hriatrengna atana Mizo Zirlai Pawl-in kumtin a hman thin, ‘Zoram Ni’ chu March 5 khan hman a ni.
MZP Gen. Hqrs. president Dr C Lalremruata chuan, India-in jet fighter hmanga Mizoram a beihna champha, March 5 chu MZP chuan kum 2008 atang khan a lo serh tawh thin a, India huatna ni emaw hel tumna rilru chawh thawh tumna lam emaw niloin, lungrual takin he ni hi an serh tih a sawi.
Ram tana nunna hlantute leh hliamte chawimawiin zahna an hlan nawn a, hnam inpumkhatna ni atan, an hliam hluite dam se, hmalam panna ni atan he ni hi hman a ni, tiin a sawi.
India Prime minister-in 2023 August 10-a Parliament-a no- confidence motion put luh tum khan, Indian Air Force-in 1966 March 5-a jet fighter hmanga an beih thu a sawilang tih MZP president hian sawiin, he thil hi Mizo mipui khawngaihna emaw ngaihdam dilna lam emaw ni lo, politics thila inbeihna atan hman a ni tih a sawi.
“India huat thar lehna emaw hel tum lehna rilru pu a hmang kan ni loa, MZP leh Mizo mipuiin kan beisei chu, India hian a tihsual hi pawm se, Mizo mipui lakah hian ngaihdam dil se kan ti a ni,” a ti.
Kumin Zoram Ni thupui – “I ram leh hnam humhalh la, khawvelin a dem lovang che” tih thupui hmangin Prof. JV Hluna leh F Vanlalrochana te panelist niin talk show neih a ni a. Govt. Aizawl College (Political Science departmen) zirlai leh sawmbikte an tel a ni.
MZP-in Zoram Ni hmang
