Mizoram University-ah Hindu pawl fir RSS (Rashtriya Swayamsevak Sangh) chhulchhuak thawktu an tam tial tial bakah BJP zirlai pawl Akhil Bhartya Vidyarthi Sangh (ABVP) pawh rawn luh an tum hle tih National Students’ Union of India chuan an sawi.
NSUI Mizoram State president RB Lalmalsawma’n thuchah a siam danin, tunhnaiah MZU vice chancellor leh thawktu pawimawh RSS chhulchhuak rawn thawk an tam tual tual a. State dang atang pawhin zirlai rawn pantu an thahnem sawt hle tih a sawi.
‘Mizorama zirna in sang berah hian mithiam lo thawk se, zirlaite pawhin rawn pan se, hma sawn zel se tih hi kan duh dan a ni a. Mizoramah chuan zirlai pawl lian pahnih – MZP leh MSU an awm bakah College Joint Students’ Union leh hnampual aiawh zirlai pawl a din tho vangin leh tha taka kan thawhho avangin NSUI anga branch neih emaw an inthlana inrawlh emaw kan tum ngai lo a. Mah se, tunhnai atang khan MZU-ah hian BJP zirlai pawl – ABVP chuan branch rawn din tumin hma an la a; MZU-a thawkte leh MZU SU leh MSU ten hma la thuaiin, huaisen taka an dodal avangin BJP zirlai pawl kha din a ni ta lo a ni,’ a ti.
Heti chung hian hnamdang zirlaiten MZU-ah zirlai hruaitu nihna an chuh ngam ta hial a, tling pawh an awm nia hriat a ni tih sawiin, hnamdang chuh ve te tlin theihna atan hian state danga mihausa leh minister lawk tak tak an inrawlha sawi a awm thu a sawi.
Heng avang hian MZU kaihhnawihah zirlai pawl leh tlawmngai pawl hrang hrang, hnam hmangaihtute hi an lo kal na deuh a nih pawhin, hrethiam thlawp turin Mizo mipui an ngen tih NSUI Mizoram president hian a sawi a ni.
MZU-ah BJP-in bu khuar tum – NSUI Mz president
