Mizoram University Department of Political Science leh Indian Council of World Affairs (ICWA) New Delhi tangdun buatsaih national seminar – “India Foreign Policy: Khawvel inthlak danglam mil zela kalpui dan” tih chu Thawhtanni khan neih tan a ni a, vawiin – Thawhlehni thleng a awh ang. Seminar hawnna hmanpuitu Higher & Technical Education minister Dr Vanlalthlana chuan, policy pawimawh duang tur leh policy a hlawhtlin theihna atan zirchian hmasak a pawimawh tih a sawi a. Ram pawn nen thawhhona atana policy chu tualchhunga policy kan neih dan nen nghet taka a inkungkaih avangin tualchhung lamin foreign policy mumal nei tur chuan kan inchinfel hmasak a ngai tih a sawi a ni.
Thupui thlan zing ami “India’s Eastern Orientation and Neighbours” chu Act East Policy nen thuhmun, Mizoram leh hmarchhak tan chuan India ramin international policy a kalpui zingah a pawimawh fal ni ah a ngai tih a sawi a. Mizoram awmna chu geopolitics-ah phei chuan India tan hmun pawimawh zual bik a nihna lai a awm tih a sawi.
“Mizoram awmna hi India tan ASEAN ram kan tih, Bangladesh, Myanmar leh Indo-Pacific biala ramdang a dawrna turin ‘kawtchhuah’ a nih bakah India leh heng ram kan sawite dawhzawmtu lei ang pawhin a sawi theih,” a ti a. He policy huanga Indian foreign policy-a Mizoram pawimawhna leh hamthatna awm thei chi pawh zirho turin a chah.
Seminar-ah hian ambassador Rajiv Bhatia, Distinguished Fellow at Gateway House Mumbai chu khualzahawm niin, foreign policy-in ngaihven a hlawh chu lawmawm a tih thu a sawi a. India-in ramdang a dawr dawna a innghahchhan, non-violence leh democracy a behchhan dan a sawihfiah a ni.
MZU vice chancellor Prof Dibakar Chandra Deka pawhin seminar hawnna hi telpuiin, ram thenawmte nena inlaichinna tha siam tur chuan ramchhung inrelbawlna fel tak neih a pawimawh tih a sawi.
ICWA aiawhin Dr Tunchinmang Langel leh Assam University aiawhin Prof Tenepalli Hari sawm an ni a, thu an sawi a ni.
MZU-ah India foreign policy zirho
