Site icon The Aizawl Post

MZU-ah international conference nei

“Current Advances in Chemical Science Research and Sustainability” (CACSRS-2026) tih thupuia hmangin Nilaini atang khan Mizoram University-ah Departments of Industrial Chemistry & Chemistry, School of Physical Science leh National Association for Chemical Security (NACS) bakah Indian Society of Chemists and Biologists (ISCB) tangho buatsaihin international conference neih a ni a, Zirtawpni thleng a awh ang.
Sawrkar laipui Ministry of Science and Technology-a Anusandhan National Research Foundation (ANRF) CEO Dr Shivkumar Kalyanaraman chu khuallian niin, inbiak hmuh theihna hmanga hawn bakah thu a sawi a. MZU vice chancellor Prof. Dibakar Chandra Deka pawhin thu a sawi bawk.
Sawrkar laipui Ministry of Earth Sciences scientist Dr Jagvir Singh leh Germany-a Technische Universität -Dresden Department of Chemistry professor Dr Jan Weigand te khualzahawm an ni a. An ni bakah hian thawhpui pawl aiawhin Ladakh University vice chancellor hlui Prof. SK Mehta, ISCB (International Society for Computational Biology) vice president Dr Mahesh Sharma bakah MZU School of Physical Science dean Prof. Suman Rai leh MZU Department of Chemistry head Prof. Zodinpuia Pachuau ten an hmanpui a ni.
India ram hmun hrang hrang (IITs, NITs, IISERs, universities leh colleges) leh ram pawn atanga zirna in tha ami mi 150 chuang an tel a. Thil siam chhuah dan thar, smart materials leh hmasawnna tluantling atana an hman tangkai theih dan tur sawiho a ni.
CACSRS-2026 hi hmarchhak bial leh a bikin Mizoram University-a zirbingmi thalaite tan chemical science leh green technologies lama thiamna leh hmasawnna thar ber ber inhrilhhriat leh inpawh tawnna hun tha a ni tih sawi a ni.

Exit mobile version