Nadal nena vawikhat tal intawn leh chaka tuihal Djokovic
Kumin hi professional tennis huanga a season tawpna a nih theih thu sawitu Rafael Nadal chu a final season-ah pawh dam ni hmel hmu hlei thei loin clay season intanna tournament lian Monte Carlo Masters khelh mekah pawh inlan thei lo zawng bawkin a inhnukdawk leh a, a ropuina mual French Open-ah pawh a hmel kan hmu dawn em a chiang ta lo ruai a; he boruakah hian khelmual chhunga a elpui lian ni kumhlun thin Novak Djokovic chuan a chawlh hma ngeia Spaniard hmachhawn leh hram a duh thu tunhnai khan a sawichhuak.
22-times Grand Slam champion Nadal hi kum 37 mi ni ve tawhin, a kum tam lam ai mahin hliam a thawhsan hlei thei tlat lo chu tennis a chawlhsan hma chhan ni dawn awmin a lang fiah chho telh tel a, 2024 season zawh ruala chawlh ve tawh a inbeisei pawh a tum aia hmaa a chawlh mai a ngaih hmel hial tawh a ni!
Khel bawr hliam damchiang hlei thei lo aanga kum khat dawn inelna a hmachhawn thei loh hnuah kumin January thla khan Brisbane-ah a kir a, mahse, kha mi hnu khan hliam dangin tlakbuak zui lehin, Brisbane tournament hnu lamah tun thlengin ATP tournament a la khel leh ta lo.
Kartawpa Eurosport-in world number one Djokovic an kawmnaah Serb chuan tennis fan a nihna zawnah a chawlh hma ngeia vawikhat tal Nadal hmachhawn leh a duh thu sawiin, “A career pumpui thlirin clay leilunga a thiltih tawh zozai kha mi zawng zawngin kan hriatpui vek a, a bik takin Roland Garros-a a thiltihzia kan hria.
“Clay tournament ropui bera a hlawhtlinna sualchhuah tawhte kha a goal ngei mai a ni a, chu chu amah pawhin a sawi tawh a, tennis leh a bik takin Roland Garros hming chhal meuha ka sawi duh chu he leilunga a inkhelh leh theih ka duhna hi a ni. Ani nen ngei mai French Open-ah han intum leh thei ila, chu mawlh chu inbeihna ropui dang a ni leh khawp ang,” a ti.
Nizan Monte Carlo Masters men’s singles round of 32 inkhel result tarlan hman lohah Djokovic hian hlawhtling taka a lo kawp thin, a coach ban tak Goran Ivanisevic tel loin a Monte Carlo title pathumna tur a beiseina kawngah bul a tan a, a hmachhawn hmasakber hi Roman Rishatovich Safiullin of Russia a ni.
Djokovic leh hun rei tawk a lo thawhpui tawh Croatian Ivanisevic kha thla hmasa maiah an inthen a, tunhnai chawlhkar chhoah Serbian hi doubles world number one hlui Nenad Zimonjic nen an thawkdun.
Kum 36 mi ni ve tawh Serb Djokovic hi world number one ni mekin, grand slam singles title 24 la tling thei pakhat zawk niin, mipa zinga major tournament hawn hnem ber a ni bawk a, chutih laiin Olympic gold medal a la hlawhchhuak ve tlat lo a, chu chuan a rilru a luah reng a, kumin hian Paris Olympics-a champion nih chu a tum lian berte zinga pakhat a nih thu tunhnai khan a sawichhuak.
Beijing 2008-ah khan bronze medal chu awrh ve bawk mah se hmasawn zawngin Olympic-ah a khawsa thei tlat lo a, Beijing hnu lama Olympic tennis inelna vawithum a hmachhawn lehah tum hnih chu third-place match-ah a tlawm.
A career-a ban phak loh awmchhun ni mek chungchang sawiin Djokovic chuan, “Paris Olympics hi a pawimawh em em a, ka tan chuan Olympics hi dahpawimawh loh theih a ni lo.
“Chutih laiin Olympic hnuhnung pathum emaw pali emawah khan final ka thleng zo tlat lo,” a ti.
Nadal nena vawikhat tal intawn leh chaka tuihal Djokovic
