Nadal thlahliamtute thukhawchang
Tennis legend Rafael Nadal chuan tun season tawp rual hian tennis a chawlhsan ve tawh tur thu a nemnghet a, uitu leh thlahliamtu a nei hraw hle.
French Open title 14 la tling thei awmchhun Spaniard hian US Open title pali bakah Australian Open leh Wimbledon trophy pahnih ve ve hawn tawh bawkin, a career-a Grand Slam title 22 kawl chungin a chawl ve dawn ta a, thla thar Malaga khawpuia Davis Cup Finals hi inelna a hmachhawn tawpna a ni ve tawh dawn.
‘Big Three’ an tih zinga pahnih Roger Federer leh Novak Djokovic-te nena hun khata tla ‘King of Clay’ hi men’s singles player zingah Djokovic tih loha hlawhtlingber niin, mipa zinga singles Grand Slam title la hnem ber Serb Djokovic chuan 24 a la tling a, Nadal hian 22 huiin, a elpui kumhlun dang Federer kutah 20 a lut ve bawk.
Nadal-a chawlh tur thu a hriat rualin Djokovic a tawngchhuak nghal a, “Naupang maktaduai tam tak tennis khel tura phurna petu i ni a, he dinhmun luahtu nih hi mi zawng zawng chak ber a nih ka ring.
“I ngheh tlatna, i inpumpekna leh i fighting spirit hi kum sawm tel tam tak mite zir a ni tawh dawn a, i sulhnu leh ro min hnutchhiah hi kumkhuain a awm reng tawh ang,” tiin Malaga khawpuia a thianpa thlahliamna hunah chuan inlan ve ngei a tum thu a tarlang tel nghal.
MIpa leh hmeichhial thliar loa tennis player piangchhuak tawh zawng zawng zinga Margaret Court-i nena Grand Slam title 24 la tling thei awmchhun Djokovic hian mimala major title la hnem ber ni thei turin tennis a la chawlhsan lo a, tun thlenga a khelh dan leh khawsazia enin kum tharah pawh hian Grand Slam tournament a la khelh zui zel a rinawm.
Federer erawh major title 20 kawl chungin kum 2022 khan Laver Cup-a a farewell tournament khel chungin a lo chawl tawh a ni.
Tennis-a lawmman tamna ber Grand Slam tournament-ah hian inkhel ropui bik, titanic battle an tih chu hmuh tur a lo awm zauh zauh tawh a, chu’ng zinga pakhat chu 2008 Wimbledon Championships men’s singles final-a Nadal leh Federer inhmachhawn kha niin, darkar li leh minute 48 an inkhelh hnuah 6-4, 6-4, 6-7 (5–7) , 6-7 (8-10), 9-7-in Spaniard a chak hram a ni.
2008 Wimbledon final-a chak zo ta lo Swiss pawh Nadal-a chawlh hun tur puan a hriat rualin a ngawi zo bik lo a, “Career ropui chungchuang neitu Rafa! He ni hi lo herchhuak ngai lo se tia duhthu ka lo sam thin ngei mai kha a ni.
“Theihnghilh ngai tawh loh tur hriatrengna min hnutchhiah zozaite avang khan i chungah ka lawm a, awihawm loh khawp he game-a i hlawhtlinna hi chawimawina dik tak chu a ni,” a tichhuak.
Nadal thlaktu anga sawi leh ngaih mek, Spaniard ve bawk Carlos Alcaraz hian kum 21 mi lek ni chungin Grand Slam title pali a la tling ve der tawh a, a naupan tet lai atanga a hero ni thin sulhnu hi engtia thui nge a chhii theih dawn hriat phak a ni rih lo.
Paris 2024 Olympics men’s doubles-a a kawppuiin a chawlh hun tur a puang ta mai chuan a barakhaih hle tih Ningani Shanghai Masters quarter-final match-a a chak loh hnu lawk khan Alcaraz hian sawiin, “Vanneihthlaktakin, Shanghai-a match ka khelh hma darkar khat la awmah he thu hi ka hria a, pawm turin ka insiamrem hman hram a ni!
“News ngaihthlak hrehawm tak a ni a, tennis ka khelh tan tirh lai atanga ka idol a nih avangin ka tan he thu dawnsawn hi a harsa zual,” tiin Nadal-a chawlh thu puanin a nghawng natzia a sawichhuak.
World number two hian social media lamah sawi chhunzawmin, “Naupang mai ka nih laiin a inkhel hi TV-ah ka thlir thin a, tennis player nih ve tumna ka neih phah a, i ruala Roland Garros-a ka inkhel ve hman leh Spain tana Olympic Games kan kheldun thei kha ka tan chuan malsawmna namai lo tak a ni!
“Level tin hniaka entawn tur min hnutchhiah avang hian lawmthu ka hrilh che a, i i sulhnu min hnutchhiah hi tumahin an tih ve theih tawh loh tur a ni. Ka hlimpui takzet thin che a, Davis Cup zawh ruala i chawl tur hi ka va uiin, ka va ngai dawn che em, Rafa!” tiin a chipui kalbo tur a thlahliam.
Mipa world number ni lai Jannik Sinner bakah hmeichhe world number four Coco Gauff, world number two hlui Ons Jabeur leh British tennis player hlui Greg Rusedski-te pawhin Spaniard chawl tur an ui thu an tarchhuak.
French Open lam pawhin X-ah thlahna thu an dahchhuak a, “Hriatrengna maktaduai tam tak min hnutchhiah avang khan i lakah hian tum 14 lawmthu kan sawi e,” tiin.
Instagram-ah Wimbledon pawhin an tournament tihlu thintu pakhat Rafa chunga an lawmzia thu an tarlang.
Australian Open pawh an ngawi thei bik lo a, X kaltlangin Melbourne Park-a hriatreng tlak sulhnu a hnutchhiah chungah uar takin lawmthu an sawi ve bawk.
ATP Tour ve thung chuan Nadal-a chawl tur boruakin a nghawng dan chu tawngkaa sawifiah ngaihna awm lo a nih thu leh Spaniard chawlh puan ni chu herchhuak ngai lo se tia duhthu an sam thin thu an tarlang a, hun ropui bik leh hriatrengna hlu tak a hnutchhiahte avangin lawmthu an sawi nghal.
ITF president David Haggerty thu te, International Olympic committee president Thomas Bach-a thlahna tawngkamte pawh a mawi!
Sports star hraw pui pui pawh an insum zo bik lo a, chu’ng zinga pakhat chu Real Madrid leh France footballer Kylian Mbappe niin, Instagram lamah thlahna thu a thlah ve a, player leh a mihring mihrinna zawna midangte entawn tur hnutchhiahtu a nih thu sawi chungin a career-a a hlawhtlinna a lawmpui a, legend a nih kumkhua tawh tur thu a hrilh.
Portugal captain Cristiano Ronaldo thu leh hla hian a hmawr bawk teh ang:
“Rafa, i intlansiak kawng hi a va awihawm loh zawk tak em! I inpumpekna leh tennis i hmangaihna baka i talent kawl hian khawvel puma mi maktaduai tam tak thinlung a hneh asin.
“I zinkawng thlir ve phaka awm leh thianpa tia koh theih i ni hi ka tan chuan chawimawina a tling.
“Awihawm loh khawpa ropui i career avangin ka lawmpui che a, hlim leh nuam ti takin chawl ang che!”
Nadal thlahliamtute thukhawchang
