Naga hel nia rinten Manipur-a Kuki in pathum hal

Naga hel nia rinten Manipur-a Kuki in pathum hal
Naga hel pawla mite ni ngeia hriatten Manipur-a Kangpokpi district-ah Kuki-Zo chenna in pathum an halsak.
K Songlung-II khuaah hian Thawhtanni khan in pathum bakah SUV hal a ni tih police chuan an sawi a, mi tumah thi leh hliam erawh an awm lo va. DIG SP Kangpokpi hovin police team-in a hmun hi an thleng nghal a ni.
He thil hi Zeliangrong United Front (ZUF) chuan an tihah an chhal a, Kuki-Zo pawl pakhat chuan darkar 24 chhunga hmalak an phut a, a nih loh chuan kawngpui dan an tum.
Tlangrama in kang lai video-te hi social media platform hrang hrangah a darh nasa nghal hle.
Kamsin-a kaihhruai nia hriat ZUF-in tu hming mah ziah hnan loh thu an chhuahah chuan, “ZUF hian dan lova poppy chin, ruihhlo tawlh leh dan lova thlahtute ram leh khawsakna hmun, Zeliangrong Inpui Naga-a ram luahsak kan dodal zel dawn a ni,” an ti.
“Vantlang hnenah inralrinna leh muanawm taka tihfel a nih theih nana hun tiam pawh siam a nih laiin zawm a hlawh lo va, tharum nen chhun dar 12.15-ah dan lova poppy chinna hmuna farm house, farm leh hmanrua leh tu hriatpuina mah tel lova Waphong, Songnung Sadar Hills, Kangpokpi district-a luah lai hmunah chet a ni ta a ni,” an ti bawk.
Indigenous Tribal Leader’s Forum (ITLF), Sadar Hills Chief Association (SAHILCA), Committee on Tribal Unity (COTU) leh Kuki-Zo pawl dang dangte chuan he thil thleng leh a titute demna thu an chhuah nghal.
Kuki-Zo pawlte hian K Songlung-II khuaah hian poppy chin a nih ngai loh thu leh an hmunhma sawite hi mihring chenna hmun nghet sa vek a ni a, farmhouse a ni lo tih an sawi bawk.
Kangpokpi-a hmunpui nei, COTU chuan Manipur sorkar chu a titute darkar 24 chhunga an chhuak ngei turin an phut a, a nih loh chuan an state luhka pawimawh pahnih, National Highway-2 leh National Highway-37 chu January 27 zanlai atanga January 28 zanlai thleng an dan tur thu an sawi.
Tun thla tir khan poppy chin thu kal vel avangin Naga hel pawl leh Kuki hel chu an lo inkap tawh bawk.