Free Movement Regime chungchangah Nagaland chief minister huai angin Mizoram chief minister chu huai ngam ve se a duh tih Congress treasurer Dr Lalmalsawma Nghaka chuan a sawi.
Zirtawpnia Congress Bhavan-a political session-ah Dr Lalmalsawma chuan India leh Burma inkarah daidanna bang siam tum thu leh Free Movement Regime min tihtawp sak chungchangah hmun hrang hrang Zofate zawiawia dan hmanga min daidan tumna ang a tih thu sawiin, “Daidanna bang avanga thenhran kan nih chuan a hnam pum angin a pawi hle dawn. Nagaland CM chuan ram mipui min rawn hmasa rawh se, a ti a; kan CM hian a ti ve thei dawn em,” tiin a zawt.
BJP sawrkarna apiangah Kristiante nekchepin an awm zel tih a sawi a. “India ramah hian pawl hnih lianpui kan awm a, pawl khat zawk chuan Hindu lal ram a din theihna an ngaipawimawh hmasa ber a; Hindu sakhaw be lote an nekchep zel. Pawl pakhat zawk chu hnam tenaute tan an ding a, sakhaw zalenna an kalpui thung. Mizo mipui hian khawi lam nge kan awn dawn,” Congress hruaitu hian a ti.
Tunah Mizoram Congress an hniam hle a, intuai thar a ngai hle tih a sawi a. Congress party chu Pathianin mipui rawngbawl tura a hman leh theih nan mipui tan inpe ral raihin insiamthar leh turin an party mite a sawm tih a sawi a ni.
Nagaland CM tih angin kan CM hian ti ve se – MPCC treasurer
