Sawrkar flagship programme – Bana Kaih policy chu kuminah chuan pilot phase ang chauha kalpui a ni a, kum thar atangin lian tham zawkin kalpui tan a ni dawn zawk tih chief minister Lalduhoma chuan a sawi. National Livestock Missions leh Handholding Scheme kal dun tir (convergence) na tur chu Zirtawpni khan chief minister hian a hawng a. National Livestock Missions (NLM) hi project cost zatve (50%) sawrkar laipuiin a tum a, a chhawrtu (partner) ten total expenditure atanga zaa 10 tumin, a bak sum leh pai mamawh dang zawng chu loan atanga hmuh tur a ni tih a sawi.
“Loan-ah hian a chhawrtuten harsatna an tawk ta thin a. An harsatna tawhna lai tak hi handholding hmangin sawrkarin a pui ve thung ang. Loan la turte tan sawrkar chu guarantor-ah a tang anga, loan an rulh that chuan loan pung (interest) kha kan subsidy leh ang. A rul tha lote chungchang erawh kan sawi tel thei lo,” a ti.
A thlawna sem emaw dawn emaw rilru kalsanin, thawhrimna hmanga din chhuah tumin ke pen mek a ni a, handholding scheme hian mi taimate lam a hawi a, chutiang mite tana buatsaih chu a ni tih a sawi bawk.
Covid 19 leh ASF hri len hma kha chuan agriculture & allied sector-a thawhchhuah zawng zawng zaa 45 chu AH & Vety atanga thawhchhuah niin, hrilen hnu kum 2021-ah chuan zaa 23-ah a tlahniam a. Chu a tlak hniamna atanga chhuah leh theihnan convergence hi a tangkai hle dawn tih chief minister hian a sawi a ni.
Handholding thawhpui (partner) diltu an tam tawh hle a, chutihlaiin kuminah chuan pilot phase ang chauhin an la kal a, nakum atangin lian zawkin an kal tan chauh dawn tih a sawi. Component pakhat zawk, CM Special Package dilna thehluhna hmun Chief Minister Office chu a diltute tana pan a harsat avangin district tina DC office-ah thehluh theih turin ruahmanna siam a ni tih a sawi.
Ran vulh sawi rualin, sa sawngbawl lam pawh ngaihtuah thlen a ngai tih Lalduhoma hian a sawi. “Meat processing industry hi Handholding scheme-ah kan telh thar dawn a. Hetiang lama theihna nei tan remchang a inhawng dawn. Ranvulhtute tan animal insurance scheme tha tak an neih a ngai a. NLM hnuaia insurance scheme kalpui thinah state sawrkar sum thawh tur hi zaa 30 a ni a. Keini ang state pachhe tan a sang lutuk a, kan tlin lo. Sawrkar laipuiah min tihhniamsak turin kan ngen a, tunah chuan zaa 10-ah min siamsak ta a ni,” a ti.
NLM hi vawkpui vulh, kel vulh, ar awpkeuna leh ranchaw siamna lama liantham taka hmalakna tur scheme a ni a. Tanpuina sum pawh a tam tham hle. Tunah hian hmarchhak state zingah Mizoram chu NLM-a titha ber niin, he scheme kaltlang hian mi 76-in loan an la tawh a, mi 31-in subsidy an hmu tawh a, mi 21 subsidy hmu leh tura peihfel a ni.
AH & Vety minister C Lalsawivunga sawi danin, kum 2023 chhung khan Mizoram-in bawnghnute litre nuai 76 a chawlut a, ranchaw pawh kum khat chhungin cheng vaibelchhe 77 man a lalut.
“Kan sum thawh chhuah ve chhun chhun hi state pawnah a luang chhuak nasa a, a uiawm thin hle. Kan dan chah theih dan awm chhun chu thar chhuah ve hi a ni. Chumi kawngah chuan tuna convergence scheme hi a tangkai hle ang,” a ti.
Nakum atangin liantham zawkin bana kaih scheme kalpui tan ang – Chief minister
