Congress leader Rahul Gandhi chuan JD(S) leader Prajwal Revanna a sexual abuse case kaihhnawihah Prime Minister Narendra Modi chu na taka beiin ‘Modi political family’ zinga tel chu ‘sualna lakah pawh himna’ tihna em ni tiin a sawi.
Rahul Gandhi chuan, “A ngai ang bawkin Narendra Modi chuan Karnataka hmeichhiate laka pawikhawihna turu takah ngawih a chuh leh tlat tawh” a ti bawk a.
“Prime Minister hian zawhna chhan tur a nei: Engkim hre vek chung siin eng vangin nge vote duh vang ringawta hmeichhe za chuang laka mawi lo taka khawsa chu a campaign pui le? Engtiangin nge, misual turu tak chuan awlsam takin India a chhuahsan theih?” tiin a sawi bawk.
Kaiserganj atanga Karnataka, Unnao atanga Uttarakhand thlengin prime minister ‘ngawih chuh rengna’ avang hian ram pumah misualte an huangtau a ni, tiin a sawi.
Congress Spokesperson Supriya Shrinate pawhin Prime Minister chuan an thawhpui JD(S) MP Prajwal Revanna an hmeichhe tam tak mipat hmeichhiatna lamah abuse tih hre reng chungin a campaign pui tho a ti bawk.
Modi leh Revanna te awm dunna thlalak tarlangin, “Modi hian a lawm mai a ni lo, Prajwal tan hian vote April 14 khan a zawnsak a ni” tiin Shrinate chuan a sawi a.
“Prajwal a sulhnu hi a rapthlak a ni. Fiction film emaw ka tihial zawk a. Mi pakhat chauh pawh ni lo, pahnih pawh ni lo, video 3,000 dawn hmeichhe thahnem tak te pawngsualna leh mipat hmeichhiatna lama beih an nih dan hmuhtheihin a awm a. He rama rape crime history turu ber a la ni” tiin a sawi a.
Shrinate chuan, “Lok Sabha MP candisate a ni mai lo, Prime Minister Narendra Modi ‘favourite’ a la ni zui a. April 14 khan Prime Minister chuan Mysuru ah a campaign sak a ni” a ti a.
“Chhui chiangtu tur SIT din a nih darkarah Prajwal hian India ram a chhuahsan nghal a ni” a ti bawk a.
“Prime Minister Modi hian engmah a hre lo em ni, teuh lo mai. Modi hian tu nge Revanna hi tih a hrechiang khawp mai a, a pawikhawih pawh a hrechiang khawp mai. A chhan chu BJP leader ngei Devaraje Gowda chuan December 22 khan Amit Shah, J.P. Nadda leh Narendra Modi te hnenah Revanna chu candidate a siam lo turin a lo ngen thlap tawh” tiin Shrinate chuan a sawi bawk.
Prajwal Revanna hi Hassan MP ni mek niin Janata Dal (S) leader leh Minister pawh ni tawh H.D. Revanna fapa a ni.
Prajwal Revanna an hmeichhe tam tak a khawih pawi tia puh niin chung a hmeichhe khuaikhem te video chu thehdarh a nih hnuah Karnataka sorkar chuan a chhuichiang turin Special Investigation Team (SIT) a din ta a ni.
Case register a nih theih nan hian Bhawani Revanna laina hnai hmeichhiain complaint a thehlut a. Chu nu chuan Revanna nupui a awm loh veleh Revanna chuan a khawih thin thu a sawi a. He nu hi Revanna te in ah hian kum 2019 atang khan kum thum lai a awm a ni.
Choka a eirawngbawla a awm lai pawhin mawilo takin a lakah a che tibawkin in chhunga hmeichhia an awmpui te chuan Prejwal Revanna chu an hlau vek tibawkin mipa hnathawka awm te pawhin hmeichhiate chu fimkhur turin an chah thin a ti bawk.
Prajwal Revanna chuan a fanu chu video call-a biain mawi lo tak takin a biak thin avangin ka fanu chuan a number a block phah a ti a. A tawpah lohtheihlohin a hna chu a bansan phah a ti bawk.
WhatsApp a Prajwal Revanna an hmeichhe tam tak te video mawi lo tak tak a ruka a laksak thehdarha lang pakhat chu a hriat mi a nih thu sawiin chu nu pawh chu Revanna te farmhouse a hnathawka awm tho a ti bawk.
Narendra Modi-an Revanna sualna hre rengin a campaign pui tho ti
