National Health Programme bawhzuina endiktuten tlawh

National Health Programme
bawhzuina endiktuten tlawh
National Health Mission hnuaia National Health Programme hrang hrang awmte zirchianga endiktu, Common Review Mission (CRM) Monitoring Team chuan Nilaini khan Health & Family Welfare Department Kolasib District an tlawh a. Addl. DC B Malsawmtluangi’n a hmanpui.
Kolasib senior chief medical officer Dr RK Lalthlamuana chuan district chhunga hriselna kawnga hmalakna a report a. Hemi hnu hian Monitoring Team hian Kolasib khawchhunga Health & Wellness Centre/ Sub Centre leh Urban Primary Health Centre an tlawh. November 20-23 chhung hian Kolasib district huamchhunga Health & Welness Centre hrang hrang, Community Health Centre, Primary Health Centre leh District Hospital Kolasib an tlawh bawk ang.
Kolasib leh Lunglei district-ah team hniha inthenin monitoring an neih zawhah state level-ah an thutkhawm pui leh dawn a. Monitoring Team hi Sarojini Naidu Medical College Agra-a Community Medecine Department professor & head Dr Renu Aggarwal chuan a ho a ni.