Nu leh paten an fate chu an sen lai atangin an balh kan hlau a, fai taka awm tir reng kan tum thin. An tal bal tur pawh theih tawpin an veng thin. Mahse, mithiam ten zirchianna an neih thar atanga an hmuh danin naupang tal bal ve thei deuh chu an hriselna atan a lo tha zawk hlauh thei.
Paediatric neurologist, Dr Maya Shetreat-Klein chuan naupang te hrisel lohna tam tak chu food allergy vang niin a sawi a, naupangin allergy a neih nasat theihna chhan zingah a fai lutuk vang te pawh a ni thei niin a sawi.
Tunlaiah chuan chet fel leh intihfai kan inzirtir nasa tawh a, hma pawh kan sawn hmasa hle, naupang pawh khawlaiah an infiam tawh meuh lo va, hei vang hian microbes leh bacteria ten an taksain natna a do theihna (immune system) a beihin an tuar chak lo bik thei niin an sawi.
New York-a cheng Dr Shetreat-Klein chuan a fapain kum khat a tlinin asthma a nei ta tlat mai niin a sawi a, chu chuan a than te a tithu ta. Damdawi chi hrang hrangin an enkawl a, mahse, ziaawm lam a pan hleithei lo. Chutah chuan ama tawkin scientific investigation a bei ve ta a, a thil hmuhchhuah chuan amah pawh a barakhaih ve hle.
Dr Shetreat-Klein chuan ei leh in chu a fapa dam lohna bul ber tih a hmuchhuak niin a sawi a, a ei leh in chuan a digestive system, immune system leh thluak thlengin a khawih niin a sawi.
Tichuan lehkhabu thar ‘The Dirt Cure’ tih a ziak ta a ni. He lehkhabuah hian naupang zingah natna benvawn a pun chak dan te a tarlang a, a bikin allergy leh ADHD a\angin rilru lama harsatna leh thau uchuakna te a tam ta hle niin a sawi a, chung chu tihreh theih niin a sawi bawk.
“Kan tih tur chu hmanlai nuna kir leh a ni deuh mai, naupang chu leivung/chirh zingah te tal tir chang nei ila, leia \o, thei leh thlai te kan ei tam tir a pawimawh a ni. Hei hian an taksain natna a do theihna a tichak thei,” a ti.
Eitur siam chawp, lei a \o ni lo ‘artificial’ food a tih te chu pumpelh tur niin a sawi a, heng ‘artificial’ food-ah hian a rawng siam nana an hman te chuan hormone lam thlengin a khawih thei niin a sawi. A zirchianna a\anga a hmuh danin chaw atana thei leh thlai ei nasat hian asthma symptom te pawh a tiziaawm thei a ni.
Naupang tal bal thin an hrisel zawk hlauh thei
