Serchhip addl SP Saidingliana Sailo kaihhruaiin Judicial lam hotute leh Women & Child Development official-te an thukhawm a. Serchhip district-a naupang venhimna chungchanga thawhhona tha zawk a awm theih dan tur an sawikhawm.
Sawrkarin naupang himna a ngaihpawimawh avangin humsual an dai lohna tur leh thil tha lo an chunga a thlen lohna turin dan a zam a, anmahni venhimna ngaihtuahtu department leh khawtlang mipui aiawh mi langsarte telna Committee din a ni. Heng department peng hrang hrang leh mipui mimirin thawhhona tha zawk an neih a, vantlang mipuiin naupangte dikna chanvo humhim a pawimawh zia leh an laka pawikhawihtute chunga hremna lekkawh a nih theih dan zau zawka an hriat theih nan he thutkhawm hi neih a ni a. Juvenile Justice Board (JJB), Child Welfare Committee (CWC), Special Juvenille Police Unit leh District Child Protection Unit (DCPU) an tel.
Juvenile Justice (Care and Protection of Children) Act hnuaiah naupang thilsual ti emaw enkawl leh venhim ngai buaipuitu police-te hi uniform hak a remti loa, kutkawl (handcuff) bun tir phal a ni lo. Jail-ah emaw Thana-ah zan riahtir phal an ni lo bawk. Naupangte tan bika din Special Juvenille Police Unit hi district tina dah a ni a, naupang thilsual ti buaipui ngai leh venhim ngaite hi SJPU-a telte chauh hian an khawih thei a ni. Naupang kum 18 hnuailam, thilsual ti te chungchang bik hi court puitlingah ngaihtuah a ni ngai loa, JJB kuta dah a ni. CWC hian naupang kum 18 hnuailam enkawl leh venhim ngai bikte chungchang an ngaihtuah thin thung.
Thutkhawmah hian official-te, police-te leh Committee peng hrang hranga member-te tih tur inhrilh thar a ni a; naupang enkawl leh venhim dan tur rawtna hrang hrang an neih an sawi ho a ni.
Naupang venhimnaah tha zawka thawh ho dan sawi
