Centre-a rorelna chelhtu National Democratic Alliance (NDA) ah Kristian MP-te an tel ve tlat a ngai a, chu chu kan tan a tha ber tih MNF MP candidate K Vanlalvena chuan a sawi.
Inrinnia Aizawl hmun hrang hranga MNF party huaihawt street campaign-ah K Valalvena chuan Lok Sabha-a a tling a nih chuan ram, hnam leh sakhaw him nan theihtawpin a bei chhunzawm dawn tih a sawi.
Party hrang hrang 40 vel awmkhawmna NDA-ah an awm a. Kristian state MP engmawzat NDA-ah hian an tel tih sawiin, “Kristian MP-te hi NDA atangin chhuak vek ila, Kristian-te min nekchep lehzual dawn tih mipuiin kan hriat a ngai. NDA-a Kristian MP kan awm tlat hi India ram pilril zawka Kristianten min thlamuanpui em em a. NDA-ah Kristian MP kan thut luih tlat hi a pawimawh,” a ti.
Hindu-in an nekchep mek Kristiante thlavang hauh a, an tana ding tlat turin Kristian MP, a chhung atanga bei tur thut tlat a ngai a. Chu chu Kristian tan tun dinhmunah chuan a tha ber tih a sawi a ni.
MNF vice president Lalchhandama Ralte, MLA chuan MP candidate 6-te an that hlawm viau laiin, MNF khin ber ZPM MP candidate chu mi tha tak ni mah se, experience la nei lo a ni a, tun ang hun thing leh raw innawh nat vanglaia Kristian MP ni tur chuan a la tuai deuh em a tih theih, tiin a sawi.
“MP atan a fit tawk a, a huaisen tawk a, a nationalist tawk tih kan hriatchian sa Pu K Vanlalvena hi vote turin mipui kan sawm a. Assam nen kan buai khan media lian zawng zawng ngaihven thamin a che a. MP sawi atan a mawi lo em aw, tih ram ram khawpin Mizoram leh hnam tan a auchhuak a. Assam Police pawhin thubuai siamsakin Delhi-ah man turin an intir hial a nih kha,” a ti.
NDA-ah hian Kristian kan tel tlat a ngai – K Vanlalvena
