NDA hruaitu thutkhawmah Lok Sabha MP
Kar hmasa Ningani, August ni 7 tlaiah khan New Delhi-ah NDA Floor Leaders’ meeting an nei a, Mizoram Lok Sabha MP Richard Vanlalhmangaiha a tel.
Mizoram Rajya Sabha MP K Vanlalvena pawh a tel a, ani hi MNF niin, MNF chu NDA-a tel an ni.
K Vena hian Lok Sabha MP a tel ve thu hi facebook-ah a ziak a, “Tun kar liam ta Ningani tlaiu dar 4.00 khan New Parliament building Committee Room pakhatah NDA Floor Leaders meeting neih a ni a. NDA-a tel party hrang hrangte aiawh MP pakhat zel tel tura hriattir kan nih angin MNF party atanga MP awm chhun ka nih avang leh sorkarna siam mektu NDA-ah MNF kan tel avangin he meeting-ah hian ka tel a. Mizoram Lok Sabha MP Pu Richard Lalhmangaiha pawh sawm a nih angin he meeting-ah hian ZPM aiawhin a tel ve a ni,” tiin.
K Vena chuan Zirtawpnia inhmukhawmte hi NDA-a tel party hrang hrang aiawh an nih thu a sawi a, MP zawng zawng ni lovin party aiawh zel an nih thu phone hmanga amah betu The Aizawl Post a hrilh.
Mizoram Lok Sabha MP tel chungchangah sawi tur a hriat thui loh thu a sawi a, “Tel turin an sawm a, an sawm angin a tel ve tih zawng ka hria a. NDA-ah an tel em tih lam chu ka hre lo a, mahse kan meeting kha chu NDA-a telte telna tur chu a ni, kan Lok Sabha MP chu thuhran ni se, NDA-a tel lo party aiawh mi dang an tel lo,” a ti.
Hemi tum hian thil pakhat an rel tih a sawi a, India ram vice president thlannaah NDA-in common candidate neih ni se tih an rel thu a sawi.
Hetih lai hian ZPM general secretary pakhat chuan parliament committee pakhata a tel vangin Lok Sabha MP hi kar hmasa Ningani-a NDA Floor Leaders’ meeting-ah khan a tel ve niin The Aizawl post a hrilh. Richard Vanlalhmangaiha hi Parliamentary Standing Committee on Defence-ah a tel a ni.
NDA hruaitu thutkhawmah Lok Sabha MP
