Rotary Club of Pen Orion, Pune Mahasrasthra hmalakna in Rotary International District 3131-a Rotary Club 16 atanga tel Rotarians 57 chuan Northeast Car rally an nei a. February 17 khan Siliguri atanga tanin, February 27 tlai khan car 16-a Rotarians 55 chuan Aizawl an thleng .
Rotary Club of Aizawl president leh a thawhpuiten Aijal Club-ah lo lawmin, hnam lam – Cheraw an entir a, anmahni lam atangin group zai leh a huhoa lam huaihawt a ni. Rotary exchange programme-a neih thin club flag inthleng tawn a ni bawk.
An team leader, Rotarian Subhosh Joshi sawi danin, hetiang car rally hi vawi sarih an huaihawtna a ni a. Northeast-a a vawikhatna a ni. Rotary Club tih larna bakah Rotary ‘areas of focus’ pasarih zinga pakhat – ‘remna awm nan innghirnghona tih reh’ na hmanrua a nih bakah ram chhung mite inpawh loh lutuk avanga innel lohna chu he car rally hian sukiang se an duh tih a sawi.
An tum leh tur chu, Manipur Moreh atanga tanin, Thailand thlenga South Asia ram 6 tlawha car rally neih a ni tih a sawi bawk.
Rotary Club hi khawvel pumah service organization lian ber leh hmasa ber niin, tunah hian member maktaduai 12 aia tam an awm a. Aizawlah chuan 1992 June 30 khan ding tanin, tunah hian member 31 an awm.
Project hrang hrang an nei thin a. Chhunkaw 10 tana Serkhana in sak sak, artificial limb camp huaihawt, free cataract surgery camp neih, bus waiting shed siam, vantlang inthiarna sak, hospital tihchantlun nana tanpuina pek leh sawrkar school-a kut silna leh tui thianghlim inna dah sak, health camp leh dan lam inhrilhhriatna seminar huaihawt chu an thil tih tawh zinga thenkhat a ni.
Tuna an project lian deuh zingah, Central Jail Aizawla hmeichhe jail tang (convict) te puanthui zirtir, naupang mit thalo tarmit pek, thalaite fuih tur leh tiphur tura mi hlawtling leh ngaihsan awm college zirlaite hmaa thu sawi tura hma lak te a tel.
Car rally-a Aizawl tlawhtute hi February 28 zing khan Tripura panin an chhuak lehnghal a. Adviser to CM H Ginzalal-a’n a vailiam a ni.
NE car rally nei Rotarian hoin Mizoram rawn tlawh
