North Eastern Council (NEC) chuan 15th Finance Commission (2022– 2026) chhungin Mizoram-ah healthcare, zirna, inkalpawhna kawngpui, tourism, agriculture leh mamawh hrang hrangah hmasawnna hna lian tam tak a thawk a. Schemes of NEC (SoNEC) leh NESIDS- Roads programme hnuaiah Mizoramah cheng vaibelchhe 339.06 hman a ni.
NEC thuchhuak chuan, SoNEC programme-ah hian NEC-in cheng vaibelchhe 123.83 sengin medical leh veterinary hmun, bazar, zirna in, cultural centre, infiamna hmunhma leh khawtlang mamawh hmasawnna ruhrel sak thar leh thuam that a ni a. Kuthnathawktute tan leilet siam, alu thar chhuah, vawk leh ar vulh, sangha dil siam, kuhva hmun siam, sapthei sawngbawl leh ranvulh kawnga hmasawnna atan hma nasa takin lak a ni bawk.
Pipute sulhnu, hmunhlui leh Mizo culture humhalh turin cultural heritage centre, tourism circuit, ecological park leh cultural infrastructure dangte siam a ni a. Heng ruhrel din leh cheithat hi eco-tourism leh cultural tourism hmasawnna atan tangkai hle tura ngaih a ni tih a sawi.
NESIDS -Roads programme-ah 15th Finance Commission hun chhungin Mizoram-ah cheng vaibelchhe 277.99 man hu road project paruk kalpui a ni a. Chu’ng zinga project pahnih, cheng vbch. 25.19 senna chu zawhfel tawh a ni.
NEC hian Saiha- Lungbun- Tlangnuam -Haka kawngpui siamthat hna pawh a thawk a. Hei hian Mizoram chhim lam district leh Myanmar ramri inkara inkalpawhna tha zawk a siam bakah India sawrkar ‘Act East Policy’ tihhlawhtlinna kailawn pawimawh a ni tih a sawi.
Ashtalakshmi Youth Exchange Programme hnuaiah India ram hmun hrang hrang atangin zirlai 581 chuan hmarchhaka zirna in pawimawh an tlawh a, January 2026 khan Andaman & Nicobar Islands leh Lakshadweep atangin zirlai 44 chuan Mizoram University an tlawh a ni.
NE-SPARKS (North East Students’ Programme for Awareness, Reach and Knowledge on Space) programme hnuaiah hmarchhak state ho atangin zirlai 786 chuan Indian Space Research Organisation an tlawh a, an zingah hian Mizoram atangin zirlai 99 (mipa 45 leh hmeichhia 54) an tel.
Kumin April khan NEC chuan Sinlung Hills Council area-a khawsak harsa zawkte tan ranvulh tanpuina a pe a, State Veterinary Information and Resource Centre a din a; West Phaileng-ah market building leh Champhai district-a Vangchhia-ah hmasawnna ruhrel dinna atan sum a pechhuak bawk.
Hei bakah hian NESIDS (Roads) hnuaiah kumin April khan cheng vbch. 20.09 pekchhuah a ni a. Hei hi kawngpui sial leh cheithat hna kalpui mek bakah Pukzing– Silsury kawngpui leh Tualpui– Champhai kawngpui siam hna thawhna atana hman tur a ni.
NEC-in 15th Finance Commission hunah Mizoram tan cheng vbch. 339 pechhuak
