Neeraj Chopra a lo pilbo hman teuh!

Neeraj Chopra a lo pilbo hman teuh!
A career bul lamah a banrek a tina a, kha hliam avang khan fei khawh a bansan hman tep tih double Olympic medallist Neeraj Chopra chuan tunhnai khan a sawichhuak.
A sawi zelnaah kha mi tuma a hliam kha javelin training laia a chhar ni loin basketball court-a a intihnat a nih thu a sawi.
Inrinni liamta khan Chopra hian Karnataka khawpui Bengaluru-ah Neeraj Chopra Classic 2025 international javelin competition a hmachhawn a, chu mi tum chuan hlawhtlinna a chan hmaa javelin a bansan hman tep thu hi zirlaite’n tawng an zirna application pakhat Duolingo an tihah a ziak.
Neeraj Chopra chuan, “Ka career tir lamah khan ka banrek ka ti na a; ka hliam kha ka training vang ni loin basketball ka khelh laia ka chetsual vang a ni a, basketball ring han vuan tura ka zuan laiin ka tla thut a, hun rei tak ka banrek chu tuam a ni a, fei ka khawhna lam a nih bawk si avangin javelin bansan ka ngaihtuah hman hial a ni,” a ti.
A sawi zel danin, a hliam chu doctor-te pawhin tihdam harsa tak a nih thu leh feikhawh lamah pawh a inlan theih tawh loh mai theih thu an hrilh niin a sawi a, amah pawh a beidawn rum rum hman hial thu a tarlang tel.
Chuti ang hun thim tak chuan bawh mah se India tana inelna hmachhawn chu a tum ber a li fan a, khawvel huap lawmman lak chu a tuihal huam huamna a nih reng avangin chu suangtuahna chuan na takin a nawr tih a sawi a, rilru hnual lo turin a inbuatsaih sauh sauh tih a sawi lang tel bawk.
Harsatna lian takin tlakbuak mah se chu chu inbawhbehtir mai duh loin 2016 U20 World Championships a lo herchhuah meuh chuan khawvel huapah hming a rawn chher chho tan ta a, U20 Javelin World Record siamin metre 86.43 zeta thui a khawh ta!
Kum 2018-a Commonwealth Games leh Asian Games a thunun ngheh bur hnu khan Neeraj hian Tokyo khuaah Olympic gold medal ngei mai a hlawhchhuak ta ruau a, India rama infiammi ropuiberte zingah a intatlut zui ta a ni.
Japan ram Olympic-a a hlawhtlin hnu khan shooter Abhinav Bindra tih loha Indian zinga Olympic individual gold awrh thei awmchhun niin, kum 2022 a lo herchhuah chuan World Championships silver medal a awrh a; kum 2023-ah world title lain, Diamond League title engemawzat bakah 2024 Paris Olympics-ah khan medal a awrh leh bawk.