India ram chhunga Sawrkar, Private leh Kohhran enkawla MBBS, BDS, BAMS, BUMS, BHMS, BSMS, BASLP& B.VSc & AH zir turte thlanna (Common Entrance) hi National Eligibility Entrance Test (NEET-UG) tih a ni. NEET-UG pass lo tan a chunga course chi hrang hrang kan rawn tarlante hi zir theih an ni lo. Kum 2025-a Mizoramin a chunga zirna kan han sawi te kan neih zat chu hetiang hi a ni – MBBS-ah seats 79 (RIMS Imphal – 7 seats, Govt Agartala Medical College – 2 seats leh Zoram Medical College – 70 seats). BDS-ah seats 12, BAMS-ah seats 2, BHMS-ah seats 3 leh GASLP-ah seat 1 a ni. Mizoram bikah chuan B.VSc & AH hi NEET (UG) kal tlanga allotment pek a ni ngai lo (SMATEE atanga pek an ni thin), kumin atang erawh chuan NEET (UG) kaltlanga allotment hi siam tawh tur a ni.
NEET(UG) hi kum 2012 atanga buatsaih tan tura tih a nih laiin, State tam takin an sawisel avangin kum 2016 atangin neih tan a ni. A tirah chuan Central Board of Secondary Education (CBSE) in a buatsaih a, kum 2019 atangin National Testing Agency (NTA) in a conduct ta a ni. NEET-UG hi kum khatah vawi khat exam thin a ni. Paper leh pen hmangin, Offline-a exam a ni. Exam pattern hi tih danglam fo a ni.
NEET(UG) exam-ah a vaiin multiple choice questions 180 a awm a, heng questions 180 te hi compulsory vek an ni. Hetah hian Physics leh Chemistry questions 45 ve ve a ni a, Biology ( Botany leh Zoology)-ah questions 90 a ni thung. Question pakhat chhan dikah 4 marks pek tur a ni a, pakhat chhan dik lohah 1 mark paih thung tur a ni. A pumpuia full mark chu 720 a ni. Exam hun chhung hi 180 minutes (3hrs) a ni. Mizoram-ah chuan Aizawl-ah chauh exam center hi a awm thin a. Kum 2022 atangin Mamit hi exam center turah an tel a ni. Mamit a telna chhan chu aspirational district a nih vang a ni. Mahse, Mamit hi kum 2025-ah an rawn paih a, Mizoram-ah chuan Aizawl-ah chauh NEET (UG) exam center a awm ta a ni. Aizawl-ah chuan zirlai exam tam dan azirin Institution hrang hrang – college leh HSS-ah te exam thin a ni.
NEET(UG) -2026 hi 3rd May 2026 (Sunday)-ah exam a ni a. Vanduaithlak takin he exam hi question then khat lo hre lawk an awm avangin National Testing Agency (NTA) chuan a cancel a. NEET(UG) exam hi cancel ngai khawpa a awm vawi khatna a ni. Hemi avangin NTA chuan kum 2027 atang chuan online (paperless) a exam a nih tawh tur thu a puang zui nghal a ni. Mizoram-ah pawh online a kan zirlaite an exam ve theih nan, state pawn kal ngai lo turin Mizoram sawrkar pawh a lo in puahchah tan a ngai hle awm e.
NEET (UG) 2026 hi ni 21st June 2026 (Sunday)-ah exam that leh a ni a. Hetah hian exam tuma inziak lut zawng zawng mi 22,79,743 an nih laiin, mi 19,99,895 chauhin an exam a. Exam zat hi kum dang aiin an tlem ta hret a ni. Hei hi a chhan ni thei anga lang chu exam nawn peih lo, phur lo mi tam tak an awm vang a nih hmel hle. NEET (UG) exam that a ngaih avang hian India sawrkar leh zirlaite pawhin sum leh pai, tam tak an sen thlawn phah a, a pawi tak zet a ni. Hetiang ang hi chu eng entrance exam-ah pawh thleng nawn tawh lo se duhthusam a ni.
NEET (UG) – 2026 exam results chu ni 16th July 2026-ah a chhuak a. Mi 11,21,185-in cut off mark hmuin, Under Graduate Medical and allied courses zir thei turin an tling a ni. Hetah hian Tribal mi 63,716 an tel ve a ni. Mizoram atangin mi 2,624-in exam form an submit a, chuta tangin mi 2,166 an exam a, mi 1,353 ten cut off mark an hmu a ni. India ram pumpuiah cut off mark hmu pha hi 56.06% a nih laiin Mizoram bikah chuan mi 62.46% in cut off mark an hmu pha a. All India level aiin kan sang zawk a, a lawmawm hle a ni. Pass mark hi kuminah Tribal tan 177/720 (40th Percentile) a ni a, nikum lam aiin sang mahsela pass hi kan tam zawk a, a lawmawm hle mai.
NEET (UG) 2026 exam-ah hian India ram pumah Aryan Gupta, Punjab a mi chu pakhatna niin Mark 715/720 a hmu a ni. A mark hmuh hi percentile zawnga dah chuan 99.9999 a ni. Pahnihna chu Haryana mi Panshul Bansan a ni a, ani pawh hian mark 715/720 a hmu a, mahse NTA in ranking criteria a siam danah pahnihna a ni thung. NEET (UG)-2026-ah hian perfect score an tih full mark (720) hmu thei hi an awm lo a ni.
Mizoram-ah chuan H. Malsawmdawngzuala s/o Lalsangzela Hauzel, Khatla Veng chuan NEET (UG) 2026-ah Mark 595/720 (percentile – 99.40602) hmuin fal takin pakhatna a ni a. India ram pumpuiah 11,875-na a ni a. Tribal zingah phei chuan 83-na a ni pha hial a ni. H. Malsawmdawngzela hi NEET (UG) exam tawh zawng zawng zingah a la ti tha ber lawr lak a ni. Mizoram bikah chuan Cynthia Lalhlupuii Shangpliang d/o Dr. Zonunthari Falkland khan NEET (UG) 2025-ah 474 mark (percentile- 96.0882934) hmuin Mizo zirlai zingah NEET (UG) exam tawhah chuan ti tha ber nihna a hauh a. He dinhmun hi H. Malsawmdawngzela hian a rawn khum chiang ta hle a ni.
H. Malsawmdawngzuala hian Class XII (Sc) hi St. Pauls HSS atangin 2025 a pass in, Mizoram pumah 3-na a ni a. NEET inbuatsaihna atan hian Zawlbuk Zirna Run, Aizawl-ah Coaching kal a ni. Ani hi State entrance Exam (SMATEE) 2026-ah khan Mizoram pumah 1-na a ni bawk.
NEET (UG) 2026-ah hian nasa takin Mizo zirlaite hian hma kan sawn a. A lawmawm tak zet a ni. Mark 400/720 chuang hmu pha hi mi 100 vel chu an awm hmel a. Mizoram quota atanga MBBS zir tur cut off mark hi kum 2025 khan 337/720 vel a nih laiin, kum 2026-ah hi chuan 430/720 vel a nih a rinawm a. Tin, State hrang hranga NEET (UG) topper an tih chhuah zingah hian Mizorama kan topper te hi an hniam fal thin hle. India ram state dangte chu sawi loh, NE State dang ho te pawh hi kan tluk lo nasa hle thin. NEET(UG) 2026-ah erawh chuan kan dinhmun nasa takin a danglam ta. Hei hi kan hauh chhunzawm zel turah pawh beisei i la. NE state hrang hrang te dinhmun han tarlang dawn i la: (Table en la).
JEE (Main) leh NEET (UG) te mark pek danah hian an Percentile hi sawi lar zawk a ni. Lehkha thiam tak tak te zingah pawh percentile leh percentage hi thil thuhmuna ngai kan la awm tlat a. A danglamna hi kan hriat a pawimawh hle awm e. A chian zawk nan English-in han dah hmasa ta ila ‘A percentage indicates a proportion out of 100, while a percentile indicates the position of a score relative to other scores in a data set”.
Percentage chu mark za-ah mark kan hmuh zat kha a ni mai a, kan hman thiam leh hman than zawk a ni a, sawifiah ngai loin kan hre thei ang.
Percentile erawh chu mi pakhat dinhmun exam ve tho midang te nen khaikhinna a ni. Eg. Mi pakhat chuan NEET (UG) exam-ah 90th percentile a hmu a. Chumi awmzia chu, exam zawng zawng atanga 90% kha amah aiin an ti chhia (mark an hmu tlem), 10% erawh chu amah aiin an ti tha, mark pawh an hmu sang zawk, tihna a ni.
A chunga kan sawi tak ang hian Mizo zirlai te NEET (UG) 2026 examah nasa takin hma kan sawn a. Kan topper pawh All India ranking-ah a dinhmun pawh a chhuanawm tak zet. Chu mai ni loin, exam zawng zawng atanga qualified (cut off mark hmu) pawh All India pumpui percentage aiin Mizoram percentage hi 6% laiin a tam. Hengte hi a chhan hrang hrang a awm thei awm e. Chungte chu –
Aizawl-ah NEET (UG) coaching center tha tak tak, kum tluana coaching kalpui thei, NEET exam pattern anga test series mumal taka kalpui thei kan neih tak vang.
Kan zirlaite zingah inelna thianghlim leh sang tak a awm tak vang.
Kan zirlaite tih tak zeta lehkha an zir vang.
A tawpna a kan sawi duh kum 10 hma lamah te chuan gap year la kher loin, zirlai tam zawk ten Technical courses hrang hrang zir turin an inziak tling thin a. Tunah chuan diltu leh exam kan thathnem tak avangin gap year lak a, coaching te kal loh chuan inziah tlin a har ta hle. Hei hi a nih dan zel tur pawh a nih hmel e. Amaherawhchu, zirlai beisei awm em em lo ten, kum 2/3 te gap year laka coaching kal kan intihhmuh leh lutuk hi chu zirlaite, nu leh pa te pawhin ngun zawka kan ngaihtuah a tul hle a ni. Kum hloh teuh hnuah General line lamah kan kal tir leh tho thin si a. An kum hloh hi a uiawm em a, chuvang chuan kum an hloh tam hmaa, General line lamah kan inkaltir hma hi a fuh zawkna lai a tam hle a ni. General line lama kal te tan hian private leh sawrkar lamah pawh hna thawh tur tam tak a awm a ni.
NEET-UG 2026 RESULT-AH MIZO TEN HMA KAN SAWN – Dr. Zirlianngura Govt. Zirtiri Res. Science College, Durtlang
