Congress te chuan July 9 khan ‘sovereign leh neutral Austria’ pian theih nana India Prime Minister hmasa ber Jawaharlal Nehru hnathawhte tarlanna neiin ‘Nehruphobia avanga tuar mek’ Prime Minister Narendra Modi te ang chuan hre nawn rawh se an ti.
PM Modi-an Austria a tlawh hmain Congress general secretary, in charge of communications, Jairam Ramesh chuan Republic of Austria chu October 26, 1955 khan a piang a, he ni hi National Day-ah an hmang a, he ni pian theih nana mi pawimawh tak pakhat chu tudang ni lovin ‘Modi-an a huat leh tihhmingchhiat a tum’ a ni tiin a sawi.
“Dr Hans Kochler, Austrian academician ngaihsan hlawh tak chuan World War II powers tena an awp hnua kum 1950 tir lama sovereign leh neutral Austria pian theih nana Jawaharlal Nehru hnathawh ropui tak chungchang a ziak a ni” tiin Ramesh chuan a sawi a.
Nehru ngaisang em emtu pakhat bawk chu kum 1970-83 inkara Chancellor of Asutria mi ropui tak Bruno Kreisky kha a ni a ti bawk a.
“Kum 1989 khan Dr. Kreisky chuan Nehru chungchang sawiin, “Tun kum zabi history hi ziah a nih chuan mi ropui tak tak te ziah lan zingah chapter ropui leh duhawm ber pakhat chu Pandit Jawaharlal Nehru chanchin a ni ang. India modern history pawimawh zingah a tel ang a, Nehru kha ka instructor pawimawh pakhat a ni” tiin a ziak lang tiin Ramesh chuan a sawi a.
“Nehruphobia tuar mek te – kan non-biological PM ang te leh kum 2019 atanga kan lehkhathiam leh tuan tha External Affairs Minister te pawh hian ngaihtuah let leh se” tiin Ramesh chan X a post a siamah a tarlang bawk.
“Nehruphobia avanga tuar mek PM”
