US-a Nevada state, Reno chhehvela ram kang avangin mi sang tel an insaseng tawh a, ram kang hian state chhunga khawpui lian pathumna dai a thlen tawh avangin inthiar chhuak an awm belh mek.
Reno hmar lama Hawk Fire avang hian mi cheng 42,000 an insaseng tawh a, mi 45,000 dang ‘inthiar chhuak tura inring turin’ tih an ni bawk tih thuneituten an sawi.
Tual chhung TV-in video a tihchhuahah chuan ram kang hian kawng a pawh tep a. Tlanga kang khuin a bul hnaia chengte a tuam nasa tawh hle bawk.
Fire-tracking website-te chuan evacuation zone chu Sierra Nevada tlang atanga Reno hmarthlanga University of Nevada thleng a ni tawh tih a lang.
Ram acre 13,000-a zau a kang tawh niin thuneituten Pathianni khan an sawi a. Mihringin an tihchhuah kangmei nia sawiin chhui zui mek a ni tih an sawi.
Civil mi pathum leh mi dang pathumin hliam an tuar tawh niin fire and rescue operations hotu, Shane Akerson-a chuan a sawi.
Hawk Meadow Trail-a ram kang hi Inrinni chawhma dar 11:15 (India-a zan dar 11:45) vela chhuak tan niin Truckee Meadows Fire Protection District chief Richard Edwards chuan a sawi.
Nevada Governor Joe Lombardo-a chuan Inrinni zan khan Reno leh Lake Tahoe chhehvel huamin Washoe County-ah emergency a puang.
Lombardo-a hian ram kang thelhnaa tel turin National Guard sipai 60 leh helicopter pahnih a tir.
Reno-Tahoe International Airport erawh insaseng ngaihna hmun pawn lamah la awmin thlawhna pawh a pangngaiin a la thlawk.
Nevada-a ram kang vangin mi sing tel insaseng
