New Vervek result pawm thei lo
Sinlung Hills Council inthlana New Vervek bial result chu an pawm thei loa, inthlan that an phut tih MNF party chuan an sawi.
MNF Tuivawl North Block thuchhuak chuan, Sinlung Hills Council inthlan chu thianghlim taka kalpui a nih an beisei laiin, New Vervek constituency-ah thil fel lo tam tak a awm nia hriat erawh pawi an ti a, hemia mawhphurtu returning officer (RO) chungah a tul anga hma la nghal turin sawrkar an phut tih a sawi.
Vote chhiar chungchangah round tin mipui hriata puan tur a nih lai a, puan a ni lo chu an hrethiam lo tih sawiin, ‘New Vervek postal ballot-in darkar thuma vote chhiarna hmun tur a thleng tlai bik leh, hemi chhung zawnga ballot box hi BLO, ZPM official candidate fanu-in amah chauha hemi hun chhung a lo awmpui hi kan hrethiam thei lo a ni,’ a ti.
Vote hi tum thum chhiar a ni tih sawiin, total vote a danglam zel tih a sawi. ‘Vote tla zawng zawng leh candidate-te total vote a inmil lo vek a. Vote thi (invalid vote) counting agent-te hriatpuina loa danglam leh hi kan hrethiam thei lo,’ thuchhuah chuan a ti bawk.
Heng thil thleng avang hian Tuivawl North Block chuan 6-New Vervek constituency inthlan result chu an pawm thei lo tih sawiin, inthlan that leh ngei an phut tih a sawi a ni.
New Vervek result pawm thei lo
