Mi tam takin chanchinthar an ngaihsak tawh lo va, chanchinthar chu min tihnual thei, min tizuai leh ninawm niin an ngai tiin tun hnaia khawvel pum huapa zirchianna tihchhuah chuan a tarlang.
Mi 10 zinga pali lai (39%) te chuan chanchinthar an ngaihven lo an ti a, kum 2017 kha chuan 29% chauh an ni tiin zirchianna neitu Oxford University’s Reuters Institute te chuan an sawi a.
Ukraine indona leh Middle East indona thleng mek te chu mi tena chanchinthar ngaihven an hnawlna chhan pakhat tiin report’s author te chuan an sawi bawk a. News hnuchhawnna chu tun ang renga a san tum a la awm lo a ti bawk.
Kumin Digital News Report atan January leh February thla khan YouGov te chuan khawvel ram hrang hrang 47-ah puitling 94,943 te hnenah survey an nei a.
Khatih `lai kha khawvela mihring billion chuang te national leh regional inthlana an buai lai a ni bawk.
Report chuan election kaihhnawih ngaihvenna chu ram thenkhatah chuan a nasa a chung zingah chuan United States pawh a tel a. Mahse, a pumpuia lak chuan a hniam lamin a kal an ti thung.
Khawvel pumah 46% te chuan news an ngaihvenna chu a tlahniam an ti a, kum 2017 kha chuan 63% a ni. UK bikah chuan news ngaihvenna kum 2015 atang khan a tlahniam char char tawh.
“News agency ten tun hnaiah harsatna an tawk nasa. Pandemic a thleng a, indona a thleng bawk a. Chung avanga mipui nawlpuiin chanchinthar an ngaihven loh phah chu thil awm tak a ni a, an mental health ngaihtuahin leh nunphung pangngaia awm mai duhin chanchinthar te ngaihsakloh an thlang a ni,” tiin report’s lead author Nic Newman chuan a sawi.
Mi tam tak chu chanchinthar chi hrang hrang tam lutuk chuan a tibuai zawk a, a then te chu politics-in a tihnual bawk, tiin Newman chuan a sawi bawk a.
Hmeichhia leh thalai naupang zawk te chuan an ngaihven lo tial tial a ti bawk a. Mahse, chanchinthara rinna nghahna erawh 40% vel la niin a la tha thung a, Coronavirus pandemic lai aiin 4% in a la hniam zawk tiin survey chuan a tarlang bawk.
Hei bakah hain traditional news sources TV leh print te chu nasa takin entu leh chhiartu an tlahniam thung a, thalai zawkte chuan online emaw social media emaw chu chanchinthar lak nan ber an hmang tawh zawk.
UK bikah chuan 73% in chanchinthar hriat nan online an hmang a, 50% in TV leh 14% in print an hmang chauh tawh.
Social media platform news-ah Facebook a la lar ber a, mahse a tlahniam tial tial tho thung. Mi tam tak ten youTube leh WhatsApp news lak nan an hmang a, TikTok sang zual zelin a tum khat nan X a khum tawh bawk.
Chanchinthar lak nan 13% ten video-sharing app hi an hman laiin 10% in X an hmang thung. TikTok chu a bik takin kum 18-24 in an hmang nasa zual bawk.
Online news lamah video a lar zual zel a, a bik takin thalaiin an uar zual a, short news video te chu langsar ber ber an ni.
“Consumer ten video chu hman a awl a, content pawimawh tak tak inbilh theih thona a nih avangin an uar a. Chutih laiin traditional newsroom tam ber te chuan text-based culture an la hmang a, mahse a tlahniam tial tial a, damkhawchhuak turin an insiam that a ngai,” tiin Newman chuan a sawi bawk.
Report chuan publisher te tan news podcasting chu investment tih ngamna atana duhawm ber a ti bawk a. Mahse,tunah rih chuan well-educated audices chauh a la nei a ti thung.
News ngaihvenna tlahniam zual zel
