Food Security Act hnuaia awm tur awm si lo engemawzat Mizoram amite chu awmtir an nih theih nan Supply minister chuan central ministry hotute a dawr.
Kar kalta khan FCS&CA minister B Lalchhanzova chuan, Union Minister for Consumer Affairs, Food and Public Distribution Pralhad Joshi hmu in, National Food Security Act chungchang leh consumer welfare lama nasa zawka hmalak dan tur a sawipui a. NFSA hnuaia awm tur awm si lo engemawzat chu an awm ve theih nana hma lakpui turin a ngen.
Department of Food and Public Distribution secretary Sanjeev Chopra leh Department of Consumer Affairs secretary Nidhi Khare te hmu zuiin Union minister nena an inkawmna thu hi a bawhzui a. NFSA quota tihpun chu India ram puma Household Consumption Expenditure Survey data uluk taka zirchian a nih hnua ngaihtuah that tur a nih thu leh chu chu hun rei vak loah hrual mum a nih a beiseiawm thu DFPD secretary hian a sawi a ni.
Consumer awareness leh rights chungchangah Mizoramah chuan consumer-te chu hmun dang aia an inthlarun avangin a bik taka ngaihtuah an ngai tih a sawi chu DOCA secretary hian proposal thehlut turin a lo rawn a ni.
Land Revenue & Settlement minister ni bawk B Lalchhanzova hian Ministry of Development of North Eastern Region secretary Chanchal Singh chu hmu in, department tih changtlunna tura Mizoram sawrkarin ruahmanna a siam chu tih hlawhtlin a nih theihnan theihtawp chhuahpui turin a sawm a. MDoNER secretary chuan minister thu thlen chu tha a tih thu leh tih hlawhtlin theih thilte an nih hlawm avangin proposal a luh hunah a lo chhinchhiah tur thuin a chhang a ni.
Supply minister hian Kolkata-a Hindustan Petroleum Corporation Limited Oil terminal a tlawh bawk a. East Zone general manager Kaushik Roy Choudhury hoin an lo dawngsawng a; Mizorama hmasawnna tam tak thleng mek zel avangin tuialhthei mamawhna a sang chho zel a. Hei vang hian HPCL hotute chu petrol retail outlet tam zawk Mizorama bun belh tura a ngen rualin, khuarel chhiatna leh buaina dang a thlen thulha Mizorama tuialhthei stock a awm theih nan oil depot siam tura a lo sawipui tawh pawh HPLC hian a rang thei anga bera a hmun tur enfel a, hma lak thuai an tum thu an lo hrilh hrilh a ni.
NFSA quota tih pun sawipui
