Ngaihdam dil turin CM phut

SASCI-a sum hmuh tur lapse chungchangah mipui hmaa ngaihdam dil turin an phut tih MNF Thalai hruaitu Lalnunmawia Pautu chuan a sawi.
Zirtawpni Mizo Hnam Run inkhawmah MNF Thalai Hqrs-in hun an hmang a. Thusawitu MNF Thalai vice president Lalnunmawia Pautu chuan, SASCI Part-I sum zaa 34 lapse chungchang mipuiin an hrechiang chho zel a, sum tam tak ti lapse tute an dem zual zel dawn niin a sawi.
Kum liamta 2025- 2026 khan SASCI Part-I sanction sa nuai 11152 a lapse vek tih sawiin, chief minister-in mipui hmaah ngaihdam a dil ngei ngei turah an ngai tih a sawi a ni.
Ropeway leh Skywalk chungchangah MNF Thalai president Pu Robert Romawia Royte a fihlim tih a chian thu MNF Thalai hruaitu hian sawiin, accused zinga tel lo nia an hriat kha, tlaikhawhnuah thuneitu sang thupek vang nia rin theihin accused zingah a tel tih social media-ah an hmu a, an ni chuan thudik namsawn a, dik lo taka thuneihna hmangsualtute chu an umzui anga, an phu tawk hremna hmuh tir an tum tih a sawi.
AMC inthlan neih zawh takah ZPM sawrkar leh an hotute an che tenawm hle niin Lalnunmawia Pautu hian a sawi a. Minister thenkhat leh MLA ten inthlan dan an bawhchhia a, MNF MLA leh hotute zingah inthlan dan bawhchhia an awm ve lo tih a sawi bawk.
Tuna Zoram dinhmun leh kal dan chu thalaite tan kawng a bo em em a, ZPM sawrkar kalpui dan chu research base niloin, hmun thim lamah min hruai lut mek tih sawiin, thalaite khawvel din thar tur leh hmasawn zawnga kal turin Mizo thalaite Mizo hnam party-ah haw khawm turin a sawm tih a sawi a ni.