Ngaihven hlawh Portugal in last 32 an lut

World Cup 2026 khelh mekah Zirtawpni zing khan last 32 khelh chhunzawm a ni a, inkhel ngaihven hlawh leh hmuhnawm takah Portugal chuan Croatia an lehthal a, last 16 an lut. Croatia lakah hian player ropui Cristiano Ronaldo chuan goal a thun a, World Cup ah hnuhma thar a hnutchhiah. Portugal leh Ronaldo te an kal zel laiin midfielder ropui Luka Modric chuan World Cup a mangtha a, World Cup atangin a her liam.
Croatia ngam loh Portugal
Europe a football ram lian pahnih Portugal te hi World Cup 2026 last 32-a an intum hmain vawi 10 an inhmachhawn tawh a, vawi 7 chakin Portugal an chungnung larh a. Croatia in vawi khat chiah hnehna an chang a, vawi hnih dang an inhnehtawk. An lo intum tawhnate hi Euro, UEFA Nations League leh International Friendly te an ni a. World Cup-ah erawh an vawi khat intumna tur a ni thung.
Portugal lakah record nei chhe viau mah se World Cup-ah erawh Croatia in record an nei tha zawk a, World Cup 2028-ah final an lut a. World Cup 2022-ah semi-final lutin pathumna an ni zui leh bawk. Hetihlai hian Portugal hi tunhnai World Cup-a an thlen san ber tum chu World Cup 2022 kha a ni a, quarter-final ah an tla. World Cup a hnuhma nei tha zawk an nih vangin Croatia hian Portugal hnehin last 16 luh ngei an tum hle. Portugal pawhin Ronaldo hun hnuhnungah champion an tumruh hle bawk a, chak tumruhna namen lo tak nen BMO Field-ah an intawng.
Inkhel hmuhnawm chu
Portugal leh Croatia te hi player nei tha dun tak an ni a, an khel a hmuhnawmin a class pawh pawh a sang hle. Midfield a indona hmuhnawm tak an lantir a, chawlhlawk hmain kum midfielder naupang leh tuan rang zawk Portugal an chungnung zawk a, game an thunun. Portugal manager Reberto Martine chuan Colombia an hmachhawn tuma player ngai 10 a ring chhunzawm a, Joao Felix aiah Rafael Leo a luhtir thung a, hei chiah hi an inthlak danglamna a ni. Rafael Leo a lut hi Portugal in an chhawra an khingpuite an nawr nat phah hle.
Inkhel hmuhnawm takah chawlhlawk hmain goal lut a awm thei lo phawt a, chawlhlawk hnu lamah erawh goal a lut zawt zawt a, goal thum chauh pawm a ni thung. Chawlhlawk hmang tangkai Croatia in fuh takin Portugal an nawr tlang a, veteran player Ivan Perisic chuan minute 53-naah fuh takin a pet goal a, hmahruaina goal a thun. Hmahruaina goal an thun vangin Croatia an phur a, an khel tha zui hle nghe nghe.
Goal an chhuah hnu lawkah Portugal in Cristiano Ronaldo hmangin goal an thun a, offside vangin hnawl a ni thung. Croatia pawhin goal an thun belh naa an goal thun pahnih ngawt chu off-side vangin hnawl a ni ve bawk.
Hnufual zawk an nih hnuin Portugal coach Roberto Martinez chuan player pali: Bruno Fernandes, Vitinha, Pedro Neto leh Joao Cancelo te a lachhuak a. Nelson Semedo, Bernardo Silva, Conceicoao leh Goncalo Ramos te a luhtir a, an khingpuite an nawr na sawt. An khingpuiten an nawr nat em vangin Croatia tlarhnung an chiai a, tul lo takin penalty an chawi. Penalty hi Cristiano Ronaldo chuan cool raihin a pet goal a, minute 68-naah an si phurh a sut. Ronaldo hian World Cup a knock-out stage-ah a vawi khat nan goal a thun a. World Cup knock out stage-a goal thun thei upa ber a ni nghal bawk.
1-1 a nih hnuin inkhel a hmuhnawm zui viau a, goal thun tumin an innawr nasa hle. Portugal coach Roberto Martinez chuan thutlukna lian siamin Ronaldo a lachhuak a, midfielder Reuben Neves a luhtir. Ronaldo hmunruak luahtu Goncalo Ramos chuan Rafael Leao siamsak tha tak chu minute 90+4-naah fuh zetin a tauh goal a, hma an hruai letna goal a thun. Portugal goal hnih thunte hi Croatia defender te tihsual ve veah a ngaih theih a, an tlak phah ta bawk si a, pawi tiin an la ui vawng vawng thin ngei ang.
Hnufual zawk an nih hnuin Croatia in an khingpuite an nawr na hle a, goal thun tumin thih thah tak meuh an thawh. Hun pek belh tawp dawn tepah Joško Gvardiol chuan goal thunin an si phurh a sut a, Croatia an lawm hman hle. VAR rawn a nih hnuin Croatia goal hi hnawl a ni hian, sawizui a hlawhin, inhnialna a chawkchhuak ta zui hle nghe nghe a ni.
Croatia goal hnawl a nih danah sawi tam zui viau mah se Portugal defender Renato Veiga khan a duh leh tum reng vanga ball pe let (back-pass) a nih loh vangin offside an lak kha an tisual lo niin a hriat thung. Portugal tantu lamain hun a tawp har tiviau mah se Portugal in minute 90+4-ah goal an thun a, an goal thun an lawm. Hei bakah hian hun rei tak chhung VAR rawn a ni a, Croatia tantu lamain an lungawi loh lantir nan khelmualah bottle leh thil dang an vawm luh vangin game a khaihlak bawk a. A tawp har dawnah dik hlel a awm chiam lo bawk.
Inkhel hmuhnawm tak chu goal dang luh belh lovin a tawp a, team ngaihven hlawh tak Portugal chuan khingpui hautak Croatia lakah fiahna hautak an paltlang a, 2-1 a hnehna changin last 16 an inhlangkai. Last 16-ah fiahna hautak dang an hmachhawn zui leh dawn a, 3-0 ngawta Austria hnehtu Spain nen last 16 luh an inchuh dawn.
Mangtha legend….
Portugal lakah uiawm taka an tlawm vangin player ropui Luka Modric chuan World Cup-a a zin kawng a zawh tawp a, player anga inlan leh tawh ngai lo turin ‘Khawvela ennawm ropui ber’ FIFA World Cup chu mittui nen a mangtha ta.
Midfielder ball thiam, fing leh tlo Luka Mordic hian Croatia tan inelna hrang hrangah vawi 202 khelin goal 29 a thun a, World Cup 2018-ah final a hruai thleng a, Golden Ball a dawng hial nghe nghe. World 2022 ah pathumna a nih pui leh bawk. Ram tan a chet that ang bawkin club tan pawh a chetha a, club tan vawi 967 khelin goal 106 lai a thun tling bawk. Mangtha legend.