Kan hmangaih tak te nena inthen hi a na kan ti thin a, thenkhat chuan tuar thiam loin kan chhiat phah hial thei. A bikin kum la naupang lam ten an la na zual a, a chhan pawh chutiang boruak chu an la tawn tlem vang a ni a, chutiang huna an ‘feelings’ chu engtin nge an tih ang tih an la hrethiam thin lo.
Hetiang hunah hian psychologist-te chuan counselling therapy te hmangin an enkawl thin a, chutih rualin mi ten engtin nge chutiang hun harsa chu an lo paltlang theih tih te an experience te ngaihthlak hi a hlawk hle niin an sawi a, tun tumah hian mi hrang hrangin an experience an sawi chhuah te kan rawn tarlang e.
Medical student Asmita Nehru chuan, “Ka thiante an tangkai khawp mai. Ka rilru te chu up bet lova sawi chhuak turin min ti a. Ka natna leh tawrh dan te an hnenah ka phawrh a, chu chuan min ti thlawl huai a, hmalam pana nun thar nei thei tura ke penna pawimawh tak a lo ni,” a ti.
Psychologist Komola Sharma chuan, “Hmangaihte nena inthenna hian rilru lamah nghawng a nei nasa em em a. Inthenna hi mi pahnih inkara inbeiseina leh duh ang intihpuitlin sak loh leh induh khawp loh avanga thleng te a ni duh hle a ni,” a ti a, “Chutiang hunah chuan kan natna leh tawrh dan te chu in up bet mai lova, sawichhuahna tur kan neih a, min ngaithlatu an awm hian kan thawl phah huai thei a ni,” a ti.
Engineering zirlai Gurveen Sehgal chuan hun awl nei hman lo a vir buaina tur insiam thiam a pawimawh niin a sawi a, “Ka chu ka rilru lak penna tur dapin lem ziah lh lehkhabu chhiar lamah te ka ramtang a, chutianga ka tih chuan ka hahdam phah thin. Kan hun lo hman dun te ngaihtuaha intih lunglen hian thil tha engmah min thlen tawh chuang lova, chuvangin kan rilru kal kual vak vak tur dan nan, kan nuam tih zawng thil dang tih tur dap thiam a tha hle a ni. Keimahni min hrethiamtu thian kawm te pawh a tha khawp mai. Awm mai mai hman lo lekin buai ila, chu chu a tha berin ka hria,” a ti.
Harsh Singh, PEC-a engineering zirlai chuan, “Kan thlah phal a ngai. Kan hmangaihte then chu a na a, mahse, kan ta lo tur na na na, kan ui beh zawh loh, kan rilrua chelh beh tlat reng hian awmzia a nei si lo va, chuvangin kal tir a, theihnghilh tum mai hi a tha ber a ni,” a ti ve thung.
Ngaihzawng then vanga lungngaih tur a ni lo
