“Mi hi an fel a ni, engmah a la bo ngai lo, Mizo hi kan fel tak tak a nia… Ka lawm tak tak a ni,” a ti a, a “Nghah loh dawr”-a a thil zawrhte a bo ngai lo chuan a tihlawm thu a sawi a.
Chhankunga a ni a, Saitual atanga Aizawl kawng, Keifang atanga km 7 velah nghah loh dawr a siam a ni. Kum 10 vel a ni tawh a, a thil zawrh leh pawisa engmah a la bo ngai lo tih a sawi.
Kawng sirah thlam a sa a, a thlam bang, kawngpui hnaih lam chu a nghah loh dawr a ni. Huan leh lo a nei a, a thlam chu a innghahna niin, zing kara a chawhmeh lakte a dah a, huanah emaw lovah emaw a kalsan daih thin. Thlam bangah chuan a thil zawrh man (rate) a tar a, chu chu ngaihtha taka kalsanin hna a thawhsan mai thin.
Zan lamah pawh a dawrah chuan chawhmeh a dah tho a, chhun zan zawmin dawr a hawng a nih chu.
A tirah chuan tuna a dawr awmna ni lo, he kawng dungah tho hian nghah loh dawr a hawng a, a bultan atangin kum 10 a ni tawh.
“Kum 10 chu ka ti tawh a, engmah a la bo lo. Covid lai pawh khan ka ti tho a, kum 10 chhung hian ka thil zawrh leh pawisa a la bo lo,” a ti.
Thil a bo lo mai ni lovin, a chang chuan a thil zawrh man aia tam pawisa a lo awm thin tih a sawi.
“A mak khawp mai, pawisa hi a man tur aia tam a lo awm chang a awm a. A rate aia tova lei an awm thin tihna a ni mai a, pawisa nawi an neih loh vangin a man tur aia tam an lo dah te pawh a ni thei bawk a,” a ti.
“Mi hi an fel ka ti. An fel tak tak a nia, Mizo hi fel deuh mai a ni kan nih. Sual te hi kan inti ve ringawt a, kan sual lo,” a ti bawk.
Zing karah emaw tlaiah emaw, hun remchang dangah emaw a dawr a’n en a, a thil zawrh leh pawisa a bo lo tih a hmuh hian a lawm thei em em mai a, “Ka’n en a, engmah a lo bo lo tih ka’n hmuh hian ka lawm thei tak tak a nia! A lo bo lo hi ka lawmna a ni, mi an fel tihna a ni a,” a ti.
“Ka fehsan daih a, eng lai pawhin mi an tlan tlang a, duh se chu duh tawkin an lo ru thei. Mahse tumah hian an ru lo a, chu chuan min tilawm thin,” tiin a sawi zawm a ni.
Chawhmeh chi hrang hrang a zuar a, raw tuai leh mau tuai hi hralh a kal ber a ti – a bikin a awm tirh lamah hralh a kal tih a sawi.
Nghah loh dawr nghaktupa titi
