Nghahloh dawr lovah pawh bo lo

Aizawl leh Champhai inkarah bazar lun tak pakhat, Dulte Bazar a awm a, ‘nghah loh dawr’ chu a ni lo, mahse a nghaktu an awm loh pawhin thil a bo lo.
Chhun lamah nilengin chawhmeh leh thei chi hrang hrang an thutpui a, zanah an hawsan thin. Zanah khualzin thahnem tak an tlan tlang a, mahse thil a bo chuang lo an ti.
An bazar hi Dulte khua atanga km 7 vela hla a ni a, mi 22 vel an inpho thin. Chhunah nilenga an thut hnuah tlaiah an haw a, zan dar 9 thlen chang te pawh an nei. Haw dawna innseng vel hian hun a heh bakah, an hralh bang, a tuka zawrh leh tur tho km 7 vela hlaa hawpui kha a lo hahthlak ve a, a tuk atan an dah ta thin a ni. Puanin an khuh a, an hawsan mai thin.
Zan lamah khualzin engemaw zat an awm chungin an thil zawrh hi a him hlauh mai a, ‘Chutiangin thil a bo ngai lo, mi hi an fel khawp mai,’ an ti.
An thil zawrh thenkhat, lo la an awm chang chu a awm a, mahse pawisa an lo dah thin tih an sawi. ‘Thil lo la hi chu an awm chang a awm a, an mamawh ngang te pawh a ni ang. Mahse pawisa an lo dah thin… A man an hre lo a, a awm tawka an ngaih an lo dah thin,’ tiin an sawi.
‘Ei mai theih thil hi a ni ber a, an riltam ngang ang a, an lo la a ni ang kan ti a. Mahse a man tur hi an lo dah zel tho a,’ an ti bawk.
Thil lo la, pawisa dah lova la pawh an awm chang chu a awm a, mahse uiawm tham an la lo tih an sawi bakah, chutiang chu a thleng zeuh chauh tih an sawi.
Dulte Bazar-ah chauh ni lovin khaw kar kawng bazar hrang hrangte hian hetiang chanchin hi sawi tur an nei ang; khaw kar kawnga inphote hian an hralh bang hi puana khuha hawsan mai an ching fur a, bo thin ta se hawsan hi thil tih chi-ah an ngai lo ang.