NGO library enkawltute intuaithar

Sawrkar hriatpui NGO library-te tana nihnih awh ‘State Level Library Seminar & Training’ tum 13-na chu Nilaini khan Aizawlah neih tan a ni a.
Mizoram Art & Culture Department, Ministry of Culture hnuaia Raja Rammohun Roy Library Foundation (RRRLF) Kolkata leh Mizoram Library Association tangho buatsaih he seminar-ah hian Mizoram puma NGO library enkawltute an tel a. A hawnna hmanpuitu Art & Culture minister R Lalzirliana chuan library hlutna chhawmnung zel tur buatsaih a ni chu lawmawm a tih thu a sawi a. “Library chu lehkhabu dahkhawmna satliah ni mai loin, zirna in chi khat a ni,” tiin, Mizote chu India rama literacy rate tha ber pawl kan nih rualin, hma sawn tur chuan ziak leh chhiar thiam chauh ni loa, hriatna dik, hriatna zau leh rintlak kan mamawh tih a sawi.
Tunhma angin lehkha chhiar kan peih tawh lo a, phone leh internet-ah kan innghat nasa a, library tlawhtu tlakhniam chhan pawh niin a hriat, tiin tih R Lalzirliana hian a sawi a. “Hei hi hnualna’n erawh hmang loin, chonaah la in, puitling bakah thalai leh naupangte tan library chu kal chakawm a nih theihna’n tan lak thar a tul,” a ti. Computer thiamna leh library-te chu a indo zawng ni loin, kalkawp tir tum tha a tih thu a sawi bawk.
Art & Culture department chuan library a changtlun zelna turin theihtawp a chhuah dawn tih a sawi a. YMA branch hrang hrangte nen thawhhona tha tak hnuaiah dinhmun tha zawka la inhlankai chhoh zel a beisei tih a sawi a ni.He hunah hian district wise library tha thlanna result puan niin lawmman sem a ni a. Library & Info. Science Ph.D hmu thar mi pasarih hnenah lawmpuina leh chawimawina hlan a ni bawk.
“Library Services in a transforming Society” tih thupui hmangin seminar neih a ni a. Dr Jacob MS Dawngliana, chu resource person a ni. Vawiin – August 10 hian library training neih a ni ang.
RRRLF hnuaiah sawrkar hriatpui YMA library 513 a awm a. RRRLF kaltlang hian state sawrkar nen intumsemin tanpuina hrang hrang pek thin a ni. Kuminah Library Day leh Librarians Day hman tawh niin, August 5-6 khan New Delhi-a Festival of Libraries neihah Mizoram State Library aiawhte an tel a ni.