Tunhnaiah NGO Coordination Committee chuan thil duh loh pahnih an neih a sawi a. An duh loh chhan hi sawiin Inrinni khan Mizoram Journalists’ Association executive committe member-te an kawm.
NGOCC hian Gokha-ten Mizoram state-a other backward class (OBC) dinhmun an neih theihna tur state sawrkar remtihna an ngen mek chu tha an ti lo tih an lo sawi tawh a. Hemi chungchang hi sawifiahin NGOCC chairman Lalhmachhuana chuan, 1950 January 26 atanga Mizorama cheng Gorkhali hi mi 7687 an awm mek a. Tuna OBC-a puang tura sawrkar an nawrnaah sawrkar laipui hnuaiah hna hauhnaah chauh an beisei niin sawi mah se, nakin hun thlirin state hnuaiah an beisei leh ngei an ring tlat a, kaltlangpui lo turin sawrkar an ngen tih a sawi.
NGOCC secretary Prof. Malsawmliana chuan state danga OBC-ten quota an neihah hian central leh state-ah an nei kawp zel a. Gorkhali-te hian central-ah chauh an dil dawn tih sawi mah se, nakin lawkah chuan state-ah an la dil an ring tlat a. Mizoram aia mihring chen tam zawkna leh Gorkhali tam zawkna – Arunachal Pradesh, Meghalaya leh Nagaland pawhin OBC dinhmun hi an pe lo a. Tribal state-a hnam dang quota lo pek lehchhawn chu a him loah an ngai tih a sawi a ni.
NGOCC hruaitute chuan Mizorama Gorkha-te chu an khawngaih viau rualin, hetiang hnam thil nghawng theiah chuan ‘humanitarian ground’ nghawt thlir theih a ni lo tih an sawi bawk.
Indian Air Force hnena Lengpui Airport pek tum nia sawi rik pawh NGO Coordination Committee chuan an duh lo tih an sawi a. Democracy ramah chuan mipui aw chu a ring ber tur a ni a, NGO-te pawh mipui zing ami an nih angin he thu hi auchhuahpui an ni tih an sawi.
Sipai kuta airport hlan chu mipui tan a tha lo zawk tih chu an pawm dan a ni a, nakinah umchhuah leh a harsat dawn avangin hlan loh an duh tih an sawi.
Heng an thil nawr chungchangah hian chief minister leh Home minister pawh an kawm tawh tih NGOCC hruaitute hian an sawi a ni.
MJA hruaitute chuan, pawl angin hemi chungchangah hian ngaihdan leh thuken an nei lo tih an sawi a. An mimal ngaihdan erawh an sawi hlawm a ni.
NGOCC-in an duh loh chhan sawi
