Mizoram leh Manipur inkalpawhna National Highway 102B siam mekah Ngopa chhehvel (package-2) siam a nih danah lungawiloin Ngopa khawtlang intelkhawmna Joint Action Committee chuan tukin, May 14 zing dar 7.00 atang khan total bandh neih a ni a, NH 102B kawngpui an dang. Thuneitu lam atangin chanchin lawmawm dawn an neih loh avangin an chhunzawm dawn.
JAC Ngopa hian NH102B Package-2 siam mekah khaw chhung kawng peng hrang hrang laih chhiat siamthat leh loh, kawng zau zawng a nih tur ang tling lo lutuk, hmanrua hman chhiat lutuk leh thildang tam takah a nih tur ang a ni lo nasa tih sawiin, hma laksak turin NHIDCL, contractor leh Mizoram chief secretary hnenah ngenna an lo thlen tawh thin a, awmzia a nei lo hle tih an sawi.
Hei vang hian JAC chuan May 13, 2026 thlenga an ngaihchan hnu ah awmzia a neih loh chuan May 14 khan Ngopa khaw chhungah total bandh huaihawt nise, tiin an lo sawi lawk tawh a ni.
An ngenna hian awmzia a neih loh avangin May 14 zing dar 7.00 atang khan total bandh hi an nei tan a, Ngopa khawchhunga sawrkar office zawng zawng leh dawr zawng zawng khar a ni. Bandh hian an khawchhungah zawm a hlawm that viau rualin, thuneitu lam atanga thu lawmawm dawn an neih loh avangin chhunzawm an tum a, thu lawmawm an dawn hma chu neih zui zel an tum tih an sawi a ni.
Total bandh hian mipui leh zin veivakte nunphung a khaihlak nasat dawn avangin hriatthiamna an ngen tih an sawi.
Ngopa-ah total bandh
