NHM atanga neih ambulance 8
in an awmna tur damdawi in pan
National Health Mission hnuaia NAS (National Ambulance Service) enkawl, sawrkar damdawi ina dah tur 102 ambulance motor 8 chu Nilaini khan Health minister Lalrinpuii’n a vailiam.
Ambulance hi Chawngte CHC, Sakawrdai CHC, Ngopa CHC, Bunghmun South PHC, Khawbung PHC, Tawipui PHC, West Phaileng PHC, Rawpuichhip PHC hnenah hlan a ni.
Mipui mamawh em em ambulance thar an nei thei ta chu lawmawm a tih thu Health minister hian a sawi a. NAS chu NHM hnuaia programme pakhat, kum 2013 atanga kalpui tan a ni a, raipuar (nau nei tur) ten thianghlim leh hrisel taka sawrkar damdawi ina nau an neih theih, nausen damlote damdawi in lama kal lam leh haw lam phur kual zung zung thei tura ambulance ruahman, damlo (emergency) enkawl hmanhmawh ngai damdawi ina phurh nghal zung zung theih chu a tum ber a ni tih a sawi.
Tunah hian NAS NHM hnuaiah ambulance motor 62 awmin district hrang hranga sawrkar damdawi in 59-ah dah an ni a. NHM hnuaia Call Centre (102) atanga darkar 24 chhung enkawl (monitor) an ni. Ambulance hi an service rei ve deuh tak avangin a tahtawla a thar thlak tura ruahman zel tum a ni.
National Rural Health Mission hi kum 2005-ah India rama kalpui tan a ni a, Mizoramah pawh hemi kum hian kalpui nghal a ni. NRHM programme hi kum 2013-ah National Health Mission tia thlak a ni a, NHM programme-ah hian thingtlang bakah khawpui (urban) lama mipui cheng a huam a ni.
NHM atanga neih ambulance 8 in an awmna tur damdawi in pan
