Mi harsa zawkte sum thawhchhuahna tangkai leh tha tak “Ni Za Inhlawhna” tia hriat hlawh thin MGNREGA chu sawrkar laipui chuan a hming a thlak a, Mahatma Gandhi hming tel tawh lovin — “Vikshit Bharat – Guaranteed Rozgar & Ajeevika Mission (Gramin) Act 2025” (VB – G RAM G Act 2025) tiin a vuah bakah, ni 125-ah a hlangkai a. Chutih laiin, tunhmaa 100% funding ni thin kha, 90:10 sharing pattern hman a ni tawh dawn bawk a.
He dan thar hi nikum December thla tawp lama siam thar kha niin, state tinte chu he scheme hmang thei tura inbuatsaih turin thla ruk chhung hun pek an ni a. Mizoram pawhin hemi chungchang hi ngaihtuah nghalin, nimin khan RD&A department changtu minister hovin an thukhawm a, budget session lo awm turah pharh hman tum a ni.
Mahatma Gandhi hming paih chungchang hi chu kan khel ve vak hman lo ang a, funding pattern erawhin khel a hlawh leh phian maithei. A chhan pawh, tunhmaa kan lo tawnhriat tawh a ni a, sawrkar laipuiin 90:10 pattern a hman thinna siksawi danglam a, a hma aia sang bituk a nihin, “Northeastern state bik tan chuan 90:10 hi min hmantir leh rawh u” tia Central sawrkar kan lo nawr thin tawh vang a ni. Chumiin a entir chu, state hnufual, state rethei, state thawhchhuah nei tlem etc. kan nih vang a ni.
‘Hnufual nih bik reng te, retheihna vauchhera sawrkar laipui tahawh reng mai te hi a tlawmthlakin a zahthlak zozai tawh’ ti kan awm a nih pawhin, an thiamawm viau awm e. Hmasawn ve viau tawh, changkang ve fu tawh anga kan han inhmuh ve dawn te pawh hian, kan nihna dik tak chu ‘central funding pattern’ ah hian a lo lang leh thin. Kan tlin ngang lo a, kan tawrh miau bawk si chuan, ‘i dil leh poh mai teh ang u’ kan ti lo thei si lo a ni.
India-in zalenna a hmuh champha kum 100-na (2047) a lo thlen huna ram intodelh, ram hmasawn, ram changkang(developed country) nih ve hman tuma tanlakna kal mek behchhana he dan thar ‘G RAM G’ hi siam a nih thu khu lama kan pute chuan an sawi a. Ni za inhlawhna a nih laia 100% funding hnuaiah ni 100 diak diak inhlawhna hmu hman lo kan nih tawh nak alaia, ni 125 a han ni ta te hi lawm tur nge, eng nge hriat thiam a har ta hle niin a lang a. Tuna funding pattern thar 90:10 ang phei hi chuan, keini Mizoram hian ‘Viksit Bharat’ hi kan thleng ve thei ngut ang em le?
Ni 100 inhlawhna thlaktu ‘G RAM G’
