Sawrkar scheme hrang hrang kalpuinaa sum hman dan endik hna thawktu Social Audit Unit (SAU), Mizoram buatsaihin Thawhlehni khan Mahatma Gandhi National Rural Employment Guarantee Scheme hnuaia social audit neih zawh tak thlirlet a ni.
SAU director C Laltleipuii chuan social audit tum ber chu, sawrkarin hmasawnna scheme leh programme a duan hrang hrangten thawh a tum ang taka sum lokal chu hman a ni em tih leh, engtiang takin nge mipuiin an hlawkpui tih mipui (beneficiaries) leh a thawktu (implementing agency) bakah sawrkar official-ten a hmuna an endik a, thil felhlel awmte a tul anga siamtha a, bawhzui zel a ni tih a sawi.
Thutkhawmah hian Mizoram district tina District Rural Development Officer (DRDO) leh Rural Development Block tin atangin Block Development Officer-te an tel a. Kumin June thla chhunga NREGS hnathawh endik (social audit) neiha hmuhchhuah te sawi ho a ni. Resource person-te report atangin District leh Block hrang hranga hma lak chhunzawm tur leh bawhzui ngai, insiamthat ngai, tul leh pawimawh awmte bawhzui dan tur sawi a ni bawk.
MGNREG Act 2005 Section 17-na leh MGNREG Audit of Scheme Rules 2011-in a phut angin, sawrkar laipui Ministry of Rural Development hnuaia centrally sponsored scheme zawng zawngah Gram Sabha hmanga social audit neih vek tura tih a ni a. Hmasawnna hnathawh leh social security scheme ho ah Social Audit Unit Mizoram hian sawrkarin a bituk ang zelin social audit a kalpui a ni. Mizoram pumah MGNREGS atan hian vawi 3500 vel social audit neih a ni tawh a. Kumin hian Mizorama khua zawng zawngah neih vek tum a ni.
Ni 100 inhlawhnaa social audit neih tawh dan thlir
