Vanlallawmzuala Varte, Mission veng, Aizawl chuan, boruak thianghlim a awm theih nana boruak tha lo tihtlem pawimawhzia auchhuahpuina ‘Ride to Clean Air’ chu thirsakawr hmangin state 28 leh UT 5-ah a pu darh a; boruak thianghlim a awm theihna atana ‘a zawna awareness campaign nei rei ber’ a ni thei hial awm e.
Aizawl a chhuahsan atanga Vairengte-a a lo let leh thleng hian ni 281 chiah a thang a, a kal thui zawng hi Km 17,043.1 a ni a, chawhrualin ni tin km 60.6 kal ziah ang a ni. Tam tak chuan, ni khat chu sawi loh, darkar khat thirsakawr khalh pawh kan peih awm lo asin.
Hetianga thupui ken neia thirsakawr (bicycle) emaw, motor car emaw, motor cycle emaw hmanga India ram fang chhuak hi an lo awm tawh thin a, Vanlallawmzuala thu ken ‘clean air’ ang thawhchhuahpui hi chu, an lo awm ve a nih pawhin, an la tam lo khawp ang.
India ram boruak dinhmun, Air Quality Index (AQI-Nov 5, 2024) ah chuan, Mizoram dinhmun a tha (thianghlim) ber a, status-ah ‘Good’ dah a ni a. Mizoram bakah hian ‘good’ status nei pha chu state pahnih Nagaland leh Sikkim chiah an awm a; PM2.5 leh PM10-ah kan hniam ber ve ve a, Sikkim pahnihna niin Nagaland 3-na a ni. State dang zawng zawng chu Moderate leh Poor vek an ni a, AQI pawh a sang hlawm hle a; Goa phei chu ‘Hazardous’ status-ah a awm vah mai.
Boruak thianghlim pawimawhzia state danga Vanlallawmzuala’n a fehchhuahpui pawh hi, AQI status atanga han thlir hian, a ti tur awm tak State kan ni, a tih theih awm e. State danga boruak thianghlim fehchhuahpui thei kan nih takah chuan, boruak thianghlim ambassador LZA thahnemngaihna leh inpumpekna hi kan chawilar a, state dang atang pawha Mizoram boruak thianghlim hip tura khualzinmite hip luttu atana kan state boruak vawng thianghlim deuh deuh tura tan kan lak a pawimawh dawn hle. Chutih rualin, bawlhhlawh thehthang leh sawngbawl lamah erawh kan la hniam hle a, state danga fehchhuahpui tlak thupui nei thei leh tura bawlhhlawh senghawi leh plastic free lamah nasa taka tanlak a pawimawh hle.
Ni 281 chhung clean air campaign
