Mizoram inthlana Ngopa-a duty tura rawn kal, Assam Police pakhat, November 5 zing atanga a awmna chin hriat loh chu November 12 thleng khan hmuh a la ni loa, Mizo dan anga ni 7 zawn a nih hnu ah Pathianni khan khawtlangin a nawlpuia zawn an titawp.
9 Assam Police ami constable Sabin Nath hi Mizoram inthlana an duty-na tur Ngopa an thlen hnu, November 5 zinga a chhuak chu a chin hriat zui a ni loa, amah hi zu avanga harsatna nei tawh thin nia sawi a ni.
Mizoram Police leh Ngopa khawtlang bakah a hnu lamah Ngopa khaw thenawm ten an zawng zui a, Assam atangin an hotute pawh an rawn chho a ni. Khawtlangin Mizo dana ni 7 an zawn thleng pawhin a chin hriat zui a ni ta loa, Pathianni khan a nawlpuia zawn hi titawpin kohhran hruaitute nen hemi pual hian hun hman a ni.
Mizoram Police uisathiamte pawh Ngopa-ah hian hruai chhoh an ni a, amaherawhchu Ngopa ram chhehvel hi mibo zawnna leh thildangah mipuiin an lo pal nasat tawh vangin mibo thawmhnaw atanga a rim behchhana chhui ngaihna awm tawh loa ngaih a ni. Assam Police pawh hi an duty hun a zawh tawh avangin Inrinni khan Ngopa an chhuahsan a, Pathianni khan Bairabi atangin relin an haw a ni.
Ni 7 zawn hnuah pawh police bo la hmu lo
