Van sang atanga puihna an dawn nen Nigerian sipaite chuan Islamist helhoin hmarchhaka Borno state-a sipai hmunpui an beihna chu chhang letin hel pawl commander lawk tak takte telin fighter 80 chuang an thi niin sipaiten an sawi.
Boko Haram leh Islamic State West Africa Province (ISWAP) fighter-te hian tun hnai kar engemaw zat chhung khan Nigeria-a kum 17 chhung zet Islamist helna hmunpui, Borno-ah sipai hmunpui an beih nasa hle.
Nilainia pawikhawihna thleng leh hi Thawhtannia Borno khawpui, Maiduguri-ah thihchilh bomb vawi khat aia tam puaka mi 23 thia mi 100 chuang hliam an awm hnuah a ni a. Hmarchhaka khawpui venhim nasat ber beihna hian Islamic firfiak pawlte hian sorkarin an laka beihpui thlakna nasa tak an do letna kawngah an kal dan an thlak danglam tih a tilanga ngaih a ni.
Khaw var hma deuhin an Niger nena an inrina bula Mallam Fatori-a sipai hmun beih a ni a, helho hi kea kalin ralthuam keng drone nnen an che niin military task force thupuangtu, Sani Uba chuan thuchhuahah a tar lang.
Sipaite hian beih hi an lo inring da niin a sawi a, Uba-a chuan ‘beih let leh mahni inven’ kalpuiin an lo chhang let a, lei lam sipai bakah thlawhna atanga puihna an dawn nen an bei let tih a sawi.
Air force-in an kap hmasa a, helho tawlh kir mek laiin allied Nigerien jet-ten an kap zui bawk a. Sipai pali an hliam a, enkawl turin an sawn chhuak niin Uba-a chuan a sawi a, thlawhna atanga an kahnaa thi leh hliam leh chhiate an en fel mek tih a sawi bawk.
Sipai chuan hel commander ‘lawk tak tak’ pathum an thi tih an sawi a, finfiah erawh a la ni lo.
Sipaite hian ralthuam chhekna hmun tam tak an hai chhuak bawk a, hetah hian assault rifle, RPG launcher, machine gun, silaimu, improvised explosive device, leh drone-a hman chi thil pawh a tel niin Uba-a chuan a sawi.
Nigerian sipaiten an hmun beitu Islamic hel 80 chuang that
