Nikuma lakhuihthei man ba pe
MIFCO kaltlanga sawrkarin kum 2023-a Sialhawk khuaa lakhuihthei leina man a bat chu sawrkar hmalakna in MIFCO chairman Lalthazuala Rawite chuan a pek tlak sak a, kuthnathawktute hnena hlan a ni.
Sawrkar hmasa hunah khan Sialhawk lakhuihthei chu theihtawpa buaipui a ni chungin, a hralhna hriat mai loh ho kha MIFCO-a dah a ni a, MIFCO-in sum a neih leh neih loh ngaihtuah loin thuneitute atanga thupek an dawn angin kalpui a ni tih Lalthazuala Rawite hian a sawi.
“Khatihlai khan lakhuihthei leina man tur MIFCO-in a lo nei si loa, kuthnathawktute tha hah man sawrkarin a lo ba rei hle. MIFCO lama ka thawhpuiten thil awmzia min hrilh a, chief minister hnenah kan harsatna ka thlen thuai a. Chief minister hian kuthnathawktute thei man batsak chu tha a ti loa, a rang thei ang berin sum min ngaihtuahsak a ni,” a ti
Fruit Juice Concentration Plant Chhingchhip ami chu an chei tha mek a, Bungbangla-ah Meat Processing Center leh Sairangah Bottling Plant an chei thar tih MIFCO chairman hian a sawi a. A hmasa atan nakum lamah sapthei sawngbawl theih an inbeisei a, lakhuihthei pawh sawngbawl an tum, tiin, “Khawl hluihlawn rei tawh a nih avangin siam ngai a tam a, kuthnathawktuten MIFCO hmalakna kan chhawr leh theih thuai ka beisei,” a ti.
Sialhawk khua lakhuihthei hralhna sawrkar hmasa hunlaia MIFCO kaltlanga sum bat hi chhungkaw 52 an ni.
Nikuma lakhuihthei man ba pe
