National Institute of Technology Mizoram puitlinna tura mutan awm sutkian a nih theih nana hma la tur leh Zoram Medical College-a post graduate course hawng tura hma la turin STAM chuan chief minister an ngen.
Science Teachers’ Association of Mizoram (STAM) hruaitute chuan Nilaini khan chief minister Lalduhoma hi a office-ah an hmu a. Lawmpuina thilpek hlan pahin science leh technology lama Zoramin hma a sawnna tura an ngaihpawimawh thenkhat an thlen.
Sawrkar laipuiin institution tha bik tura a duanm India ram puma 31 emaw chauh awm NIT chu Mizoramin nei ve mah se, hmasawnna mumal awm loin kum 20 chuang a kal tawh a. NIT hmasawnna tura mu tan ber forest clearance tihfel a pawimawh thu te, NIT chu zirlaite bakah kutthemthiam thil buaipuitute leh entrepreneur-te tana chenfakawm zirna in tha lehzual a nih dan turte an thlen.
ZMC-a post graduate course hawng tura rawtna an thlen chu National Medical Commission (NMC) pawmpuina (full recognition) hmuh a nih veleh post graduate course hi hawn theih a nih tur thu chief minister hian a lo sawi a. STAM chuan lawmawm an tih thu an hrilh nghal a ni.
Mizorama science leh technology lama inpui ber, Directorate of Science Technology and Innovation chu department puitlinga hlankai a tul thu STAM hian an thlen a. Tun dinhmunah department puitlinga hlankai theih a nih chiah loh pawhin chak zawka hma la thei tura tih len (upgrade) ngei tul a tih thu chief minister hian a lo sawi a ni.
NIT tipuitling tura hma lak leh ZMC-a PG course hawn rawt
