NLUP tha zawk kan siam leh dawn
– Lalnunmawia Chaungo
Sawrkar hnathawk awm lohna chhungkua tan NLUP changtlung leh belh tlak zawk an siam leh dawn tih Congress hruaitu Lalnunmawia Chaungo chuan a sawi.
Sinlung Hills Council inthlan tura campaign khar ni, Inrinni khan MPCC senior vice president Lalnunmawia Chaungo chuan Congress party politics chu ram leh hnam hmasawnna a ni a, chutiang tur chuan mahni inphatin an che chhuak tih a sawi. Roreltu nihna chu incheina a ni tih ngaihtuah loa mahni inhaivur tuipuitute vangin bial mipuiin an nih tur ang niloin an chanvo an chang pha lo thin, tiin, Congress party chuan hruaitu nawr kal chawp ngai an nei ve lo chu Mizoram mipui tan a tha hle tih a sawi.
“Thil fel lo leh dik lo hi kan siamtha dawn. Sawrkar hnathawk awm lohna chhungkua tan NLUP changtlung leh belh tlak zawk kan siam dawn. Mizoram mipuiin a zar an zo leh dawn a, hlim takin an nun an hmang leh thuai ang. Hei hi Mizoram hmun hrang hranga mipuiin an nghakhlel a, an lunglen ngawih ngawih a, ruahmanna tha zawk duang turin ngaihtuahna kan seng mek a ni,” a ti.
Council enkawl turin mitha, bial aiawha ding ngam mi huaisen, bial mipui sum enkawl tura mi rinawm thlan chhuah a ngai tih Congress hruaitu hian a sawi a. Pathianin SHC huamchhung enkawltu tur candidate tha tak tak a pe a; bial tina mipui pawhin Congress candidate-te ah beiseina an nei sang hle tih a sawi. Congress candidate-te hi sawrkar dawr tur pawha mithiam leh mi tlang an ni, tiin, “SHC hi Congress sawrkarin a huamchhung mipui dinhmun ngaihtuaha pawimawh a tih em avangin a puitlin a ni a, a hringtu enkawl tluka tha leh hmangaihna dawng an awm ngai lo,” a ti.
NLUP tha zawk kan siam leh dawn – Lalnunmawia Chaungo
