Pathianni zan khan ATP Finals 2023 khelh tan a ni a, Green Group atangin Novak Djokovic leh Jannik Sinner ten hnehna an chang nghal. World No. 1 ni chunga kum khar tura vawi khat chak mamawh Djokovic chuan a tum a hlen nghal a, a vawi riat nan No. 1 ni chungin kum a khar dawn.
ATP Finals 2023 bul tannaah inelna thlengtu Italy tlangval Jannik Sinner chuan tha takin bul a tan a, a khingpui Stefanos Tsitsipas lakah set hloh lovin hnehna a chang nghal. Kum naupang te ni chunga ATP Finals-a lo inlan tawh Sinners hian champion hlui Tsitsipas lakah a khel tha viau a, an tualzawlah ngampa takin a inlan. Game inthlau lo takah Sinners hian break a neih a chhawr tangkai a, game li hloh chungin set hmasa a la.
Set hnihnaah Sinner a chunnung hnuin set hnihnaah an inhnehtawk zui leh viau a, an game a inthlau lo lehpek hle. Set khat la tawh Sinners hian break pawimawh tak a nei zui leh a, 6-4, 6-4 a hnehna changin, duhthusama thain bul a tan.
Sinners leh Tsitsipas ten inkhel hmuhnawm an lantir hnuin Novak Djokovic leh Holger Rune te an inhmachhawn zui ve leh a, inkhel hmuhnawm takah champion lai Djokovic chuan harsa takin hnehna a chang.
ATP Finals-a a inlan hmasak berah Denmark rawlthar Holger Rune a chetha nghal viau a, vawi ruk champion tawh Djokovic a chhaihbuai. Rune hian set khatna tir lamah break a nei nghal a, hmahruai fal theihna hun remchang nei bawk mah se a serve a hum zo bik lo. Game an inlak chhawk zak zak hnuin tie-break-an Rune a chungnung a, set hmasa a la.
Hmuhnawm taka set khatna an khelh hnuin set hnihnaah pawh an inhnehtawk zui leh viau a, tie-break hmanga thelh an ngai zui leh. Set hnihna tie-break-ah Djokovic a chungnung ta viau thung a, Rune-a’n point khat bak a hmu lo. Set khat ve ve an lak hnuin deciding set an khel chhunzawm a, set pawimawhah Djokovic a chungnung ta viau thung a, game thum chauh hloh chunga set la in, 6-7(7-4), 7-6 (7-1), 6-3 in hnehna a chang zui ta a ni.
Green Group-a a khelh hmasak berah Holger Rune a hneh vangin Djokovic hian No. 1 ni zui tura a mamawh point a hlawhchhuak nghal a, No. 1 ni chunga kum khar ngun ber a nihna tizauh belhin, record khum har zawk tur a siam belh. Inelna kal mekah hian a champion thei a nih chuan ATP Finals-a champion ngun ber record thar a siam thei dawn bawk. Pathianni zana a khingpui Rune nen khan vawi nga an inhmachhawnna niin Serb hi 3-2 in a chungnung ta chiah a. Head to Head-ah 3-0 a hma a hruaina Jannik Sinner leh head to head-ah 10-2 a hma a hruai mekna Stefanos Tsitsipas a hmachhawn zui leh dawn a, semi-final lut turin rin a kai hle.
Thawhtan zan khan Red Group a mite an inlan tan a, result kan tarlang hman lo.
No. 1 ni chung kum khar tur Djokovic
