Noah Kahan-a’n No.1 album a nei ve ta

Noah Kahan album thar ‘The Great Divide’ chu Billboard 200 (US albums) chart No.1-ah a debut a, hetihrual hian Kehlani self-titled album ‘Kehlani’ chu top 5-ah a debut a, Michael Jackson ‘Thriller’ album pawh top 10-ah a rawn lang thar ve leh ta bawk.
Billboard 200 chart hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna bakah streaming atanga album hralhna tlukpui leh album-a hla a mala hralhna atanga album tlukpui te belhkhawm thin a ni.
Noah Kahan album ‘The Great Divide’ hi a studio album palina niin, a top 10 album pahnihna a ni a, a album hmasa ‘Stick Season’ chu 2024 khan No.2 a lo kai tawh. The Great Divide hi kar khat chhungin US-ah 3,89,000 hralhin chart No.1-ah a debut a, chung zinga 2,12,000 chu streaming (on-demand official stream maktaduai 215.37) niin, kumina album tlangzarhah chuan kar khat chhunga stream nasat ber a la ni a, album tak tak hralh chu 1,75,000 niin, album-a hla a mala hralhna atangin 2,000 a tling thei bawk.
The album hi Billboard-in chart ranking siam nana streaming an lak tel tan, December 2014 atangin rock album zinga kar khat chhunga US-a album hralh that ber a la ni. Noah Kahan hian June ni 11-ah The Great Divide Tour kick off Orlando, Florida-ah a nei nghal dawn a ni.
Noah Kahan album hi chart No.1 lo ni tawh pahnihin dawtin, Ella Langley ‘Dandelion’ chu 1,12,000 hral lehin No.1 atangin No.2-ah a tawlh a, Morgan Wallen “I’m the Problem” chu 81,000 hralh lehin No.2 atangin No.3-a a tawlh ta bawk.
Kehlani album ‘Kehlani’ chu 69,000 hralhin, No.4-ah a debut a, he chart top 10-a lang thei album pali a neihna a ni a, kumin R&B hmeichhe album zinga kar khat chhunga hralh that ber a la ni bawk. ‘Kehlani’ hi streaming atangin 45,000 (on-demand official stream maktaduai 45.37) niin, album tak tak hralh chu 24,000 a ni bawk. He album hi a hla hit ‘Folded’ awmna kha niin, he hla hi Kehlani hla zinga Billboard Hot 100 chart top 10-a lang thei hmasa ber niin, January thla khan No.6 a kai.
Chart No.1 hlui BTS ‘ARIRANG’ chu 56,000 hralh lehin No.4 atangin No.5-ah a tawlh a, Justin Bieber ‘SWAG’ pawh 47,000 hralh lehin No.5 atangin No.6-ah a tawlh leh ta bawk.
Michael Jackson album ‘Thriller’ chu 45,000 hralh lehin No.7-ah a rawn lang thar leh ta a. He album hi April ni 24-a Michael Jackson biopic ‘Michael’ cinema hall-a an tihchhuah atangin hralh a kal thar leh ta a ni. ‘Thriller’ hi khawvela album tlangzarh tawh zinga hlawhtling berte zinga mi niin, 1983-84 chhung khan kar 37 chhung chart No.1 a lo ni tawh a, solo artist album-ah chuan he chart-a No.1 ni rei ber a la ni.
Olivia Dean ‘The Art of Loving” chu 43,000 hralh lehin No.6 atangin No.8-ah a tawlh a, chart No.1 hlui Morgan Wallen “One Thing at a Time’ chu 39,000 hralh lein No.10 atangin No.9-ah a insawn leh hret a, Noah Kahan album dang, ‘Stick Season’ chu 38,000 hralh lehin No.11 atangin No.10 a kai thar ve leh ta bawk.