Norway-a US embassy beihnaah unau mipa pathum man

Norway-a US embassy beihnaah unau mipa pathum man
Norway-a Pathiannia US embassy kawta thil puak chhuina kal zelah unau mipa pathum man an ni.
Thuneitute chuan puak hi building kawta dah, improvised device hmanga tih niin an ngai a. Chhiatna tenau a thlen bak hliam tuar an awm lo.
Unau thum hi kum 20 chho vel vek an ni a, Norway khua leh tui, Iraq nena inzawmna nei an ni tih Norway police attorney Christian Hatlo chuan Nilaini khan thuthar lakhawmtute a kawmnaah a sawi.
An zingah hian police-ten a hmain rinhlelh thlalak an tihchhuah tawh zinga mi pakhat nia hriat pawh a tel niin broadcaster NRK chuan a tar lang.
Hatlo-a chuan, “Firfiaka bomb tihpuah anga rinhlelh an ni,” a ti a. An unau hming hi puan a ni lo va, a hmaa police-te lo hriat tawh an ni lo vek bawk.
Thuneitute chuan pawikhawihna thlengah hian thil ni thei eng emaw zat an chhui mek zel a, ram dang mi inrawlh an awm em tih pawh an chhui tel.
Hatlo-a chuan, “A pawimawh ber chu anmahni (rinhlelh mante) zawhna a ni a, eng nge thleng zel tur kan en ang,” a ti.
Chhuitute hian tun kar tira thlalak tihchhuah bakah hian he thil thlen lai vel hian Google Maps-a video tihchhuah chu an enfiah mek bawk.
Tuna paih tawh video-ah hian Iranian supreme leader hlui, Ayatollah Ali Khamenei a lang niin tual chhung chanchinbute chuan an tar lang a, ani hi thla hmasa tawp khan US-Israel-ten Tehran-a beihpui an thlaknaah a thi.
Police-te hian embassy beihna hi an ngai pawimawh hle a, uisathiam, drone leh helicopter hmangin a hmun hi an chhui.
Oslo-a Ullern district, Morgedalsvegen Street-a embassy-ah puak hi Pathiannia tual chhung huna zing dar 02:00 (India-a zing dar 06:30) vel kha a ni.
A hnua social media-a thlalak tar lanah chuan embassy consular section luhna pawna vur karah darthlalang ke chhia a darh nuai a, darthlalang kawngkhar a chhia a, chhuata tile phah chu a dum huam bawk.
Norway thuneitute chuan he thil thleng hi pawm zam chi loh tih an sawi a, Foreign Minister Espen Barth Eide chuan ‘inpalai tawnna hmun venhimna hi kan tan a pawimawh hle’ tiin a sawi.
US State Department thupuangtu pawhin an chhui mek tih a sawi ve bawk.