Nuai 50-in MLA fund pung

MLA-ten an bial chhunga hmasawnna hna an thawhna tur MLA Local Area Fund chu kumin atang hian MLA pakhatin cheng nuai 200 an hmang thei tawh dawn.
Planning & Programme Implementation department-in hriattirna a tihchhuahah MLA tinin an bial hmasawnna atana kumtina sum an hman theih, cheng nuai 150 ni thin chu nuai 50-a tipungin nuai 200 a ni tawh dawn a. A punna hi zaa 33 chuang a ni.
MLA fund tihpun a nih avang hian Mizoram sawrkar chuan kumtin cheng vaibelchhe 20 a sen belh dawn a; kum hmasa lama kumtin cheng vbch. 60 sen thin chu vbch. 80-in a pung dawn a ni.
MLA fund tih pun tur chungchang hi kumin January 8-a State Legislative Assembly-a party tin aiawh telna – General Purpose Committee (GPC) thutlukna siam tawh zulzuia kalpui a ni a. Finance department-in a pawm hnu-ah Planning department hian hriattirna a chhuah a ni.
Kumin February 27-a 2024- 2025 budget a pharhnaa a thusawiah finance changtu chief minister Lalduhoma chuan hemi chunchang hi a sawi lang lo naa, budget (Annual Financial Statement) ah erawh tarlan a ni tawh.