Karliamta Zirtawpni khan Juventus chuan thuchhuah siamin, Coppa Italia final khelh lai leh a hnu lam zela a chet dan mawi lo avangin an coach chhawr lai Massimiliano Allegri an ban tih an puang.
Karhmasa Nilaini Coppa Italia final-ah khan inkhel tawp dawn hnaih lama referee thutlukna a sawisel dan uchuak deuh avangin referee Fabio Maresca chuan red card phawrhkhumin a hnawtchhuak a; Turin club chuan an record kawl lai belhchhahin a tum 15-na atan Coppa Italia title hlawhchhuak bawk mah se kum thum chhunga an trophy hmasaber lawm boruak chu head coach banin a hliahkhuh ta a ni!
Kha final match-ah khan Juve chuan sikhat faiin Atalanta an hneh a; hun tawp dawna touchline atanga hnawhbo Allegri lungawi lo chu inkhel tawp rualin match official-te nen an inbakkaih zui a, inkhel hamtute hmachhawn mai duhtawk loin Juventus staff leh newspaper director pakhat lakah pawh tharum a thawh zui zel niin Italian media-te’n an chhuah a, kartawp Zirtawpniah Serie A club chuan an thutlukna puangin manager ban thu an nemnghet ta a ni.
Kum 56-a upa an coach ban chungchanga club thuchhuah chuan men’s first team head coach a nihna an hlih chhan sawiin, “Coppa Italia final khelh lai leh a hnu lama a nungchang mawi lo thenkhat avangin club chuan a chet dan kha a pawmzam thei lo a, Juventus hlutna tihniamtu niin, kah dinhmun chelhtute chet dan tur a ni lo,” an ti.
Italian football thuneitu sang FIGC lam pawhin thuchhuah siam ve tawhin, Coppa Italia final-a Allegri leh Tuttosport newspaper director Guido Vaciago inbakkaih dan kha an Prosecutor Office lamin an chhui mek thu an tarlang.
Allegri hi kum 2014 khan a vawikhatna atan Turin club enkawl tura lakluh niin, kha mi tum khan season nga chhung a enkawl hman a, kum hnih zet ‘management’ a chawlhsan hnuin kum 2021 khan a vawihnihna atan rawih nawn leh a ni.
A hun hmasa zawkah khan a zawn zatin Juve chu Serie A title leh Italian Cup pali a lakpui.
A ho hian kum 2014-15 leh 2016-17 khan Champions League runners-up anni bawk.
Juventus-a a hun hnihnaah erawh a hlawhtlinna a hniam ta duai a, Turin club chu transfer chungchanga financial scandal-ah h thiamloh changin, 2022-23 season tawp lamah khan point 10 ngawt paihsak an ni nghe nghe!
Champions League-ah pawh hming lo chher pha ngat tawh team kha third-tier Europa Conference League playoffs khel turin an tling pha ve ta hram chauh a, mahse, chu pawh UEFA Club Licensing and Financial Fair Play rules bawhchhiat vangin European competition reng renga tel phalsak an nih tak loh avangin an khel zui thei ta lo a, tunah coach buainain a tlakbuak zui leh ta zel a ni.
Nungchang mawi lo Allegri an ban
