JC.Zoremi Hmar Joute
Hringfa tungchhova kal, nikhaw hre chin tawh phawt chuan kan nuna duhthu sàm loh lai kan nei theuh a, puitling chin tawh phei chuan thâwk khat thih châk kan nei ngei ngei thin. Chu ai chuan chuti zawk chu ni se la, hetiang ni lo hian chutiang chuan awm thei zawk ila tiin duhthu âi ang kan sàm fo thin.
Hringnun hi a mawi a, a ropui a, a chhenfâkawm thin a ni tiraw. Mahse he hringnun vêk hian beidawnna ruamah min hnûk lût ve fo bawk. Leiba ngah vang te, zirlai tan fail vang te, kan hmangaih tak mai ten min thihsan emaw, chhungkaw keh darhna te, fate sualna avang te leh natna benvawn leh natna khirh tak mai te hian lungngaihna nasa tak a keng tel a, dam thlâkhlelh lohna te, nun ninna ten min rawn bei chat thin.
Kan duhthlanna avanga piang emaw, kan duhthlanna avanga thi emaw kan ni lo va, kan pian dan turah te, kan nu leh pa duh zawng thlang thei kan ni lova, Pathianin a ruat angin kan piangin kan thi a ni. Nun i nin avang ngawt khan ‘khawnge ka’n thi teh ang’ tih theihna dan pakhat mah i nei lo va, min petuin duh taka a duan nunna chungah hian thu neihna pakhat mah i nei lo. Thih hi zalenna emaw i tih tlat châng te, hrehawm zawng zawng reh vekna tur emaw ti-a hmelmapain a beih rual chiah che khan ngaihtuahna dik lo leh a zawma zawm ngeih lo a ni tih hre chhuak thuai ang che. Hringnun hian fiahna min pe fo a, a tha lo zawk zawh tur kawng min kawhhmuh vat bawk a, hnehtu ropui nih hi thil har a ni lo va, dawihzep taka heng hringnun thansar hmachhawn ngam lo nih pawh awl za tê a ni.
I hringnun kha thawpik leh hahthlak, hrehawm tak ni-a i hriat khan, nangmah ang tho-a hrehawm ti, nun thlahlel lo nuaih tam an awm ve tho tih hria la, thih hial i châk ang tho-a i thil tawn tlukpui leh a aia hrehawm daih zawk tuar vete khan huaisen takin an pal dài a, hlim tak leh engthawl tak anga langin an nui hram hram thin asin! Nangmah chauh i inngaihtuah a, khawngaihthlak bik leh vanduai bik ni-a i inhriat tik apiangin i rilru a no zual bik a, hringnun lakah i pangchang deuh a ni lo’ng maw tiin ngaihtuah nawn leh chhin teh aw.
Ngawlvei i ni emaw, mahni taksa zuar duh khawpa dinhmun khirh-ah i ding a ni mai thei. Mahse hei hi hria la, i sual fâl bik lo aw. Sawrkar, khawtlang leh chhungte duh loh i ni lo. Sual bik tura siam tumah kan awm lo. Sim tlak lo khawpa misual an awm lo va, sual man chu thihna ni mah se, sim man chu ngaihdamna a ni tih hre reng ang che. Pathianin sual sim a ngaihdam theihna hi a sâng a, rilru hah natna leh thih châk khawpa beidawnna hi ramhuai hna thawh a ni lo a, natna a ni. Dam lo i ni a, enkawl dam theih natna i vei mai chauh a ni.
Harsatna hi hringnun kawnga kan chak tawk leh tawk loh fiahna a ni a, hrehawmna hi hringnun zirlai a ni. Beidawnna hi beiseina êng lo lanna hmanrua a ni a, rilru hahna hian Pathian min hnaihtir fo. Heng harsatna leh hrehawmna te hi tlanchhiatsan chi a ni lo, a tawpah min nangching leh tho tho. Chu ai chuan engtia lo hmachhawn tur nge tih ngaihven rán chunga i lo zir chian a ngai a, i paltlang ngam chinah zel hnehna i chang ang. Chinfel theih a nih laia lo hmachhawn a, rilru paukhauh taka kan lo dawnsawn a ngai a ni. Vawi leh khata chinfel duak theih a ni lo fo a, a hmatiama lo malmak ngauh ngauh mai kha mi nghet zia, hringnun thawnthu-a a changtupa thlen san ber lai tur chu a ni mai.
Kan zoram hi ipik leh engthawl lo ni-a i hriat a, i dik lohna lai an châng thup niin i hriat chuan, ram dang khawiah mah hringnun tuihnâng dang i hmu chuang lovang. Mizote chu tapte tahpui a, lawmte lawmpui kan ni a, i hawina lam apiangah lainattu leh nangmah pui thei tur che awmna ramah hian mi pahnih khat tawngkam leh thil tih vanga i nunna lâk duh hial khawpa i awm a nih chuan, i thih phal lo hi nuaih têl kan awm tih hi hre reng ang che.
Thih hial duh khawpa i awm kha mak kan ti lo. Mi thenkhat chuan an hrehawmna up bo a, hmet bet mai lovin an puang chhuak thin a, i hrehawmna, i rilru hahna leh ipik tak kha bun chhuak ang che. Tichuan i rit phurh a lo zâng hawk ang a, ven khat chuan i veng huai ang a, lo hrethiamtu che leh lo hnemtu tur che thlang thiam ang che. Tun laiah rilru doctor pan te hi thil zahthlak ni lovin thil finthlak lutuk zawk a ni a, hnam changkang apiangin an uar a nia.
Nun beidawn chhanah chuan chhuanlam leh mawhpuh tur i hre hnem viau a ni thei. Mahse han ngaihtuah nawn leh la, i harsatnaa a tam zawk kha nangma siam chawp natna, nangma bul tan leh nangmaha tâwp an ni ang. Puitu leh hnemtu tha tak nei mah la, i sual an rawn simsak thei lo che ang bawk khan i huam chinah bak an pui thei lo che a, thawvenna leh zàn hawkna, damna nei tur chuan nangma rilru kha a pawimawh ber. I nun tihrehawmtu leh nêk chêptu chu runluih suh. Buaina chinfel ahnêkin i mualphopui mai mai; mahni intichhe zawnga runluih châkna hi mihring min tichhetu lian ber a ni.
Eng thil pawh a êng lam zawnga thlir thiam mi nih tur a ni. A thim zawnga kan thlir chuan kan khawvel hi awm rei nana tlâk loh, dam rei pawh chakawm lo khawpa beidawnthlak a ni a, a êng zawnga kan thlir erawh chuan dam thlakhlelhawm, mawi leh nuam, hahdam si a ni thei. Kan thil thlir dan hian kan nun chhungril ber a kaihruai a, kan thil thlir dan azirin khawvel hi a nuamin a nuam lo thei hle a ni tih hi vawng tlat ang che. He khawvelah hian tumah chhan nei lovin kan dam lo. Tum nei lote hi sualin a bitum thin; chuvangin eng emaw ti kawng zawng emaw talin tangkaina neih ve tum la, nun hlutna hi midang hnen atanga dawn chi a ni lo va, i pianpui leh i neih sa a ni a, peipung rawh le.