Nupa kum belhkhawm tam ber
Lyle leh Eleanor Gittens, USA a cheng te chu kum 83 an innei tawh a, an nupa kum belhkhawm pawh kum 216 a tling tawh a, nupa damlai zinga kum belhkhawm upa ber an nih bakah, chhinchhiah theih chinah, mitthi tawh zingah pawh an damlai a anni aia nupa kum belhkhawm tam zawk an la awm lo niin Guinness World Records chuan a tarlang.
Lyle hi kum 108 ni tawhin, Eleanor Gittens hi kum 107 a ni tawh a, Clark Atlanta University-ah 1941 khan intawngin, a kumleh, 1942-ah an innei zui ta a ni. An intawn tirh chuan Lyle hi an college basketball team-ah telin, Eleanor hi an inkhelh laia lo au phurtu zinga mi a ni ve thung.
June ni 4, 1942-ah inneiin, Lyle hi sipai training lai a ni a, a nupui neih dawn hian training atangin ni thum chhung chiah chawlh an pe nghe nghe a ni. Khawvel Indopui Pahnihna a ni a, an inneih hnu lawkah Lyle pawh an Army unit, 92nd Infantry Division chu ral doin Italy lamah an thawk chhuak nghal a, Eleanor chuan, “Damin kan inhmu leh ang em tih pawh a hriat loh, kan fa hmasa ber tur ka pai a. New York City-ah, Lyle-a chhungte bulah ka pem ta a ni,” a ti.
Lyle-a sipai tan laiin ani aircraft parts company-ah thawkin, a pasal nen lehkhathawn bak chu inbiak pawhna dang a awm bawk si lo a, an lehkha inthawn lak chu military mail clarks lamin an lo endik hmasa leh vek thin lehnghal a ni awm e.
New York City-ah an inbengbel ta a, fa pathum- Angela, Ignae leh Rogers an nei a, indopui a zawh hnuah sorkar hna an thawk dun zui ta a ni. Eleanor hian kum 69 a nihin Fordham University atangin Urban Education-ah doctorate degree a dawng nghe nghe a ni.
Lyle leh Eleanor te chu hetianga rei tak chhung nupa hlim taka an inneih theihna thuruk an zawh a, Eleanor chuan, “Kan inhmangaih vang a ni,” a ti a, Lyle chuan, “Ka nupui hi ka hmangaih a,” a ti ve bawk.
Nupa kum belhkhawm tam ber
